Mañan 8 di mei lo bay tin e Super Radiothon pa recauda fondo pa e iniciativa ‘Happy to Give Back’. Pa 24 ora, Canal 90 lo transmiti e Super Radiothon aki cuminsando mañan pa 9or di mainta y termina diasabra 9or di mainta.
Lo bay tin diferente entrevista, entre otro cu Daniel di CEDE Aruba, tambe cu companianan cu a haci nan donacion y Arubianonan famoso manera Edward Cheung. Lo bay tin musica en bibo y diferente weganan divertido. Esnan scuchando lo por pidi locutornan manera Ivo Yanez y su yiu Zyon, Leo y Joasy, Robert y Siomara pa toca nan cantica favorito. TeleAruba tambe lo transmiti parti di e Super Radiothon aki en bibo pa asina esnan na cas por wak esaki via di television.
‘Happy to Give Back’ ta enfoca riba recaudacion di fondo por medio di donacion di residente y amigonan no residente di Aruba pa asina por brinda ayudo directo na esnan di nos comunidad cu ta den mas necesidad. Tur donacion lo wordo usa pa apoya Fundacion Pa Nos Comunidad (FPNC), Cruz Cora y otro organisacionan cu ta yuda esnan cu mas tin mester. Actualmente ‘Happy to Give Back’ a recauda 185 mil dollar y nan meta ta pa yega 1 miyon di dollar den fondo. Tur donacion haci durante e Super Radiothon aki lo bay 100% pa e iniciativa ‘Happy to Give Back’. Nos kier invita comunidad di Aruba, en especial nos comerciantenan, pa sintonisa Canal 90 cuminsando mañan 9or di mainta y contribui na nos iniciativa y asina yuda nos yuda esnan den mas necesidad na Aruba. Pa mas informacion por bishita nos Facebook page ‘Happy to Give Back’ of nos website www.happytogiveback.com
