E obhetivo primario di e Encuesta di Entrada y Gastonan (Budget Onderzoek) ta pa colecta informacion di gastonan di consumo y pa determina e importancia di productonan na momento di calcula e Indice di Prijs pa Consumidor (CPI).
E Encuesta di Entrada y Gasto 2016 a entrevista 918 hogar, a tuma lugar di mei pa juli 2016 y a consisti di 2 parti:
- un formulario di pregunta, unda a nota e gastonan substancial cu a ser haci door di e hogar durante e luna cu a caba di pasa te cu gastonan haci 1 aña prome cu e encuesta.
- Un buki di gastonan diario na unda cada hogar a wordo puntra pa nota, durante dos siman largo, tur e gastonan diario cu cada miembro di e hogar a haci.
E focus ta riba gastonan di consumo pa miembronan di e hogar (Consumption expenditure). Gastonan di consumo ta wordo defini, segun Nacionan Uni, como gastonan y servicionan haci door di un hogar y usa pa satisface e necesidadnan y deseonan di e miembronan di e hogar. Sumanan manera placa poni riba cuenta di spaar, sumanan di inversion of pagonan pa un fianza, no ta gasto di consumo. CBS ta haci uso di e codificacion internacional COICOP di Nacionan Uni. E lista di COICOP ta cubri 12 sector manera presenta den e grafico di “Na unda mi placa ta bay”. E gastonan ta un averahe pa luna di un hogar consistiendo di un promedio di 2.6 persona. Por multiplica e suma di cada sector cu 12 pa haya e gasto pa aña. No ta tur hogar tin mesun patronchi di consumo pesey e grafico ta representa un averahe pa tur hogar na Aruba.
Awor cu e resultado aki ta cla CBS lo revisa e base pa calcula inflacion na Aruba. Den e publicacion tin un lista extenso di gastonan mensual pa hogar pa luna (pagina 24) cu ta determina e importancia di cada producto of servicio ora di calcula e Indice di Consumo pa Aruba.
E Encuesta di Entrada y Gastonan a duna tambe como resultado un entrada bruto (di tur fuente) averahe di Afl. 4,551 pa luna. E suma aki ta basa riba 1.6 persona den e hogar cu ta contribui na e entrada. E patronchi di consumo di e hogarnan na 2016 no ta diferencia hopi compara cu e resultadonan di e encuesta na 2006, manera ta visibel den tabla S1 di e publicacion (pagina 11).
E publicacion ‘Income & Expenditure Survey 2016: Unda mi placa ta bay’ ta disponibel riba nos website: www.cbs.aw (https://cbs.aw/wp/index.php/category/labour/income/) of riba nos Facebook Page Central Bureau of Statistics Aruba . Pa mas informacion por acudi na L.G. Smith Blvd.160, den e edificio di Sun Plaza of comunica cu CBS na telefoon 524-7433, via fax 583-8057 of e-mail na [email protected]
