Situacion na Venezuela perhudicando Aruba Airlines y su empleadonan

Tin situacionnan cu a presenta cu a pone cu tin vuelonan cu a cancela, pero na mesun momento ta nifica cu tin hendenan cu no por sigui traha pa motibo cu no tin vuelo.

Frank Arendsz ta un di esnan cu ta encarga cu maneho di Aruba Airlines, kende ta conta cu segun rumornan cu Aruba Airlines ta mandando hende cas, no ta completamente berdad.

Locual cu ta haciendo ta cu tin un departamento cu ta e Call Center cu a cuminsa cun’e na momento cu Aruba Airlines a cuminsa crece. Nan tabata tin hopi yamada, reservacion cu ta bin aden cu mester a pone un Call Center extra. Tin uno caba na Venezuela, pero a pone uno na Aruba, pa ricibi yamada y haci reservacion y compra via e liña eynan.

Eynan ta reserva pasashi y den 24 ora tin cu bin na oficina cumpra ticket. Sino e reservacion ta cay automaticamente afo. Cumprando ticket via e Call Center tambe ta asina cu ta reserv’e pabo y si kier paga cu un credit card, tambe ta posibel. Asina ey e ta wordo haci tambe.

Situacion na Venezuela perhudicando Aruba Airlines y su empleadonan

Posted by 24ora on Friday, April 5, 2019

Segun Arendsz, di tempo cu e frontera a cera door di e gobierno Venezolano, cos a bira hopi slow, pasobra Aruba Airlines tin su mercado di Venezuela como 90%, na unda cu esey no ta existi mas.

E 90% ta pasaheronan cu ta bin Aruba cu ta bay via Aruba, como un hub, cu ta bay Miami, cu ta bay Boneiro, Corsou. Esey no tin mas. Ta pasa cu un 10% ta keda cu ta bendiendo awo pa Miami. E call Center, unda tin dos persona trahando, a haya ta cera e call center eynan pasobra e no ta produci y tambe cu ta riba un hold pa wak con cos ta bay para cu por kisas den futuro ta habri’e bek.

Tambe tin dos hende dimas na e ticket office na aeropuerto. E dos hendenan a drenta ultimo aden y a pidi nan door cu cos a bira tiki fastioso y no tin mucho coy haci, ta stop nan contract y asina nan tambe a bay cas. Ta cuater hende a bay. No ta algo cu a pasa di un dia pa otro, ad hoc, pero ta cos cu tin planea cu e dia cu el a cera, despues cu a pasa un tempo, a mira cu cos no ta bay bon. Despues di 6 siman, e mester a sosode cu a dicidi di stop e contract di e personanan aki.

Fuera di esey e rutanan di Miami no ta bulando, pa e mesun motibo ya menciona. Tur e vuelonan no tin pasahero practicamente. Aruba Airlines tin dos buelo si den April awor aki, cual ta gruponan grandi cu a cumpra ticket for di Januari. Ta bay bula riba e fecha di 22 di April cu 29 di April pa Miami. Eseynan ta habri den e sistema cu por ta cu tin algun luga. Arendsz no ta kere mas, pasobra nan ta conta di 130 pa 140 persona. A habri e sistema pa por bende e resto di stoelnan.

E otro dianan, tur e vuelonan ta cancela pa motibo cu e vuelonan ta bashi y a cera e sistemanan pa no sigui boek. Ningun agencia di biahe, e website, tur ta informa cu tin un paro na e operacion di Miami.

E vuelonan interinsular, ABC, eseynan si ta sigui door normal. No tin problema cu esakinan. E vuelonan ey ta bulanan hopi bon, segun Arendsz. Tur e vuelonan aki casi tur ta yen. Ta un bon señal cu publico eyfo ta acepta e operacionnan cu ta na ora y tambe cu ta yega na bo destino tin biaha prome cu ora. Esey ta sigui normal, segun Arends.

Aruba Airlines tin plannan pa futuro. Tin diferente organisacion of diferente aerolinea cu ta interesa den Aruba Airlines. Tin un operacion na Sur America cu un grupo ta hopi interesa den Aruba Airlines pa bula pa Aruba y Aruba Miami. Ta bezig cu esaki. Esey ta hopi leu caba, segun Arendsz. Tambe tin un proyecto pa Canada y pa Europa. Tambe ta bezig cu eseynan, cual Arendsz no por amplia mucho riba nan, mirando cu nan ta den pipeline pa e aña aki ainda. Ta di spera cu tur cos finalisa bon. Aruba Airlines ta sigui opera. Nan ta pensa cu e ceramento di frontera dura hopi, lo por start cu dos vuelo pa Miami. Pero esey ta den estudio pa wak ki dianan ta miho pa bula y con ta bay haci’e. Esey tambe ta den pipeline. Tin cu mantene e ruta eynan. No por lage cay pasobra si lage cay, ta hopi dificil bek pa bay haya e ruta eynan.

Crew

Na Aruba ta operando e ruta di Cuba pa Guyana, un vuelo diario y cada biaha tin un rotation. E crew ta sigui cu nan actividadnan. Hopi di nan ta dunando vakantie den e temporadanan aki pa asina por cuminsa bek, tin tur bek den cas. Cu esaki e aerolinea no tin problema.

Otronan afecta

Arendsz a splica cu e hendenan indirecto cu a sufri e efecto, ta e groundhandlers riba tur station. Tanto na Venezuela como Miami. Pero e hendenan aki ta haciendo otro cos. Nan ta outsource pa Aruba Airlines. Pero indirecto, Arends no por pensa cu tin hendenan cu a keda afecta. Esnan cu ta hopi mas cu stress, ta e trahadonan mes directo cu ta na Aruba. Pero ta premira cu e cos ta bay ta bira bon.

Esfuerso

Gobierno di Venezuela a wordo acerca den dos ocasion y tur dos ocasion nan a nenga. Na prome instante, na Januari ultimo, a trata y a logra di haya solamente pasaheronan pa bula for di Venezuela pa Aruba, cu tin paspoort Hulandes y tambe hendenan cu otro pasaporte, pero cu tin permiso pa keda na Aruba. Tambe tur pasahero cu ta bay Miami, pa demostra cu nan tin un ticket pa Miami ida y buelta. Cu eseynan por a haya un weaver pa por a transporta nan. Pero e biaha aki a bay papia cu Gobierno. E prome reunion cu nan tabata tin cu nan, a bisa cu nan lo bay evalua. E di dos biaha cu a bay pa wak kico ta bay pasa, nan a nenga rotundamente cu nan no ta bay bula mas. Ta un frontera cera y ningun hende no por bay ni bin. No a logra den esaki, segun Arends.

Na Aruba tambe, a papia cu e gobierno tocante di e situacion, pero no pa posibilidad pa ayudo. Simplemente e situacion con e ta y no por haci mucho, pasobra no tabata directamente den man di Aruba. Arends tabata na Corsou pa dos dia. Aparentemente e prome minister tambe di Corsou a bisa cu nan ta bezig pa wak cu gobierno di Venezuela pa habri frontera. Si por haci un esfuerso pa habri’e mas lihe posibel pa e parti humanitario. Tin hopi Venezolano cu ta na Corsou, kier manda cos pa nan famianan, pero no por. Eynan tambe nan tambe ta papiando hopi cu e gobierno pa wak kico ta bay pasa.

Empleadonan ta trankil

E empleadonan mes ta trankil. Arendsz mes ta papia cu nan, brief nan. Na Aruba tin un bon team di empleado. Nan ta hopi comprensivo. Tur hende ta wordo paga tur luna normalmente.

Kico ta bay pasa

E bon temponan cu tabata tin, segun Arendsz, pero awo ta pasando un tempo malo. Pero e ta sigur cu e bon tempo ta bay bin bek. Pa motibo cu e proyectonan cu Aruba Airlines tin pendiente, e bon tempo ey lo bolbe. Mester tene pasenshi, Arends a finalisa.

Comments

comments