Jonathan Kalugdan sigur a spanta ora cu el a tende fiscal di Ministerio Publico pidi un castigo di 11 aña di prizon p’e awe den corte. Fiscal a exigi un castigo di prizon di 11 aña contra e sospechoso di 25 aña di edad, acusa di intento di homicidio contra un polis di rango brigadier den Cuerpo Policial di Aruba. Jonathan den pasado tabatin e fam Amaya pero cu tempo a cambi’e pa Kalugdan. E ta naci na Aruba, dia 28 di januari 1997.
Riba prome di mei 2022, e sospechoso Jonathan Kalugdan a dicidi, durante un control di polis, pa ranca sali bay cu su auto diripiente y cu velocidad halto, caminda el a lastra e polis casi 100 meter y a bay riba un palo di luz. E agente policial di 31 aña di edad a resulta gravemente herida door di e caida y boksmento cu e palo di luz. E sospechoso a sigui core bandona e sitio.
Mas despues a haya un arma di candela banda di e auto. Separa di posesion di e arma aki, ta acus’e tambe di a menasa dos persona na un sitio nocturno e mesun anochi ey cu un arma di candela. Ministerio Publico ta tuma e sospechoso masha na malo cu el a comete violencia contra un agente policial. Dunadonan di cuido manera polis mester wordo juist proteha contra tur forma di violencia. Sigur den un caso manera esaki cu no tabatin ningun motibo pa violencia, fiscal a bisa.
Corte lo dicta sentencia riba 4 di November pa 8:15 am.
