No obstante cu ta diadomingo, cu normalmente ta haci menos test pasobra poco hende ta test den fin di siman, toch e cantidad di casonan positivo di Covid-19 a subi awe. No solamente ta analisa e casonan pero e positivity rate, cu pa e ultimo siman tabata hopi abou, hasta bou di 10%.
Departamento di Salud Publico di Aruba (DVG) a informa awe cu 8 persona a recupera, pero di otro banda a registra un total di 16 caso nobo di Covid-19, di cual 4 ta no-residente.
E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 482 test. Mirando e cantidad di testnan cu a sali positivo, banda di e cantidad di testnan haci bou di nos localnan, ta saca afo cu nos ‘Positivity rate’ entre nos residentenan ta 25%. Esey ta un di e nivelnan di mas halto den e ultimo simannan.
Mester menciona cu, algun experto tabata tema cu lantamento di e medidanan mucho trempan. Ta sinti cu gobierno, bou presion politico den pleno eleccion, a opta pa suavisa medidanan coriendo un risico grandi cu si comportacion di publico no cambia, cu casonan lo sigui aumenta. Ta menciona por lo menos dos scol unda a manda alumnonan cas den cuarentena debi cu tin un posibel “kluster” eynan.
Un otro experto riba e materia a sigura na nos cu Covid a bin pa keda. Pues cu nos mester por spera cu rato rato e lo lanta cabes atrobe, tanten cu nos no logra vacuna mas ciudadano. Mientras cu ta keda un grupo cu no kier vacuna, nos lo sigui haya klusternan ta lanta cabes aki aya, cu tur consecuencia cu e ta bin cu ne. Ta pesey, pa awo, e solucion ta keda vacunacion.
Casonan activo di Covid-19 pa awe ta 64, cu ta nifica cu el a subi basta. Algun dia pasa nos a hasta alcansa 50 caso so activo. E cantidad di mortonan relaciona cu Covid-19 ta keto bay na 107 caso.
