Ayera e caso contra ex Minister di Labor, drs. Paul Croes, a yega su final den Corte di Apelacion (Hof). Durante e ultimo dia aki, e casa di Paul Croes, esta Melony Croes-Paesch a trece parti di su defensa padilanti riba e acusacionnan di labamento di placa. E defensa presenta pa abogado Demis Illes tabata hopi fuerte.
Algun punto interesante treci padilanti durante e tratamento a mustra cu hues den prome instancia a declara Melony Croes liber (gedeeltelijk vrijspraak) riba cualkier envolvimento cu “ontheffingen”. Es decir, e acusacion di witwassen no tabatin ningun base – grond delict – for di unda placa sushi lo a bin. Y te cu ayera Ministerio Publico no a presenta ningun prueba nobo cu ta indica di cua otro fuente ilegal e negoshinan di Melony Croes lo a haya placa sushi. Banda di esaki, Melony Croes-Paesch ta e unico sospechoso cu a bay den Beroep contra OM den caso IBIS. Ningun otro a apela e sentencia, si no ta OM a bay den beroep contra nan.
Un punto interesante ta cu banda di cu no tabatin ningun acusacion concreto contra Melony Croes-Paesch, e rapport financiero di Ministerio Publico tabata yena cu erornan. “Den 1 habri y cera di wowo, den menos di 1 minuut, nos experto financiero a constata 100.000 florin na 1 eror den e rapport di OM, anto bo ta acusa mi cliente di 200.000 di laba placa?” asina abogado Demis Illes a mustra hues den corte.
Na final Melony Croes-Paesch den su propio palabranan a describi e proceso traumatico aki cu e ta biba aden hunto cu su famia pa casi 5 aña caba. El a bisa cu pa su persona tabata facil pa tuma 240 ora di trabou comunitario den eerste aanleg, pero e no ta bay tuma castigo pa algo cu e no a haci. E trauma y efectonan di e caso aki ta hopi profundo y esaki por a nota sigur den su propio palabranan cu hopi emocion den corte.
