Mas o menos seis luna despues di sentencia den e caso Avestrus den Corte di Prome Instancia, ya caba esaki a aparece riba rol di Hof. Esaki a causa hopi strañeza. Manera ta conoci, Ministerio Publico no a keda contento cu e decision den algun caso pa cual a dicidi di apela. Di otro banda tin acusadonan manera e politico Benny Sevinger, y Maria Arends, kendenan a dicidi di apela tambe.
Dia 12, tres hues di Hof den un sesion na Aruba a trata e peticionnan cu por tin ainda. P’esey e tabata un Regiezitting y no e tratamento profundo ainda. E shete acusadonan cu ta papia di dje ta Benny Sevinger, Maria (Leoncita) Arends, Ninosca Nuñez, Edgard (Gaby) Werleman, Pieter Susebeek, Carlo Mansur y Curt Harms. Nan mes no a presenta den e sesion ey, y e no tabata necesario tampoco pasobra e sesion aki tabata un formalidad.
Mirando resultado di Corte di Prome Instancia, e biaha aki defensa di Sevinger a pidi pa scucha algun testigo ya cu nan por duna miho informacion riba e famoso compra di e gym pa Sevinger, segun loke Ministerio Publico a trece dilanti. Nan por splica cu no ta trata di un regalo cu e politico a ricibi.
Tambe tin testigo relaciona cu compra di un tereno, e team negociado di un di e proyectonan menciona, e compra di ticketnan pa casa di Sevinger (supuestamente cu placa di Fundacion Curason Berde).
Pero tambe tin defensa di otro acusado cu a pidi pa Sevinger mes como nan testigo.
Di banda di Werleman y Nuñez, a pidi pa scucha un notario, un peticion rechasa den Corte di Prome Instancia. Pero e notario por splica miho e asunto di traspaso di negoshi.
Fiscal mes no a haya chens pa reacciona. Lo haci esaki dia 20 di september awo. Cada banda lo bolbe haya un chens despues di a reacciona prome cu e huesnan pone un fecha pa nan decision. Pues basta punto ainda pero cu Hof a bisa lo informa kico ta nan decision riba 20 di september.
E tratamento profundo mes ta programa tentativamente pa e siman di 13 di mei, 2024. Pues un siman largo.
