Gobierno cu paso grandi pa cu agenda LGBTQIA+
Mientras parlamento ta tratando un ley pa introduci matrimonio homosexual, gobierno a dicidi di duna prioridad na e agenda LGBTQIA+. E plan ta pa inventarisa con discriminacion ta tuma luga. En conexion cu esaki gobierno kier “educa” pueblo encuanto e grupo LGBTQIA+ pa asina combati discriminacion contra nan.
Tambe gobierno lo enfoca riba ampliacion di e derechonan liga cu union civil. Asina gobierno ta alinea su mes cu e mesun agenda cu ta promove transexualidad y cu kier introduci “educacion” riba topico di LGBTQIA+ p’e muchanan na scol.
E agenda LGBTQIA+ ta boks cu Cristianismo
No ta secreto cu e agenda LGBTQIA+ ta bay linea recta contra norma y balor Catolico y specialmente cu doctrina encuanto matrimonio. Ademas e movemento LGBTQIA+ ta bagatelisa cristianismo como un religion anticua, corumpi y ignorante. E ta boga pa silencia tur idea cu tin un origen religioso, bao di e pretexto di separacion di iglesia y estado. Ademas e movemento LGBTQIA+ tin e tendencia pa acusa cristianismo di ta un religion cu ta fomenta homofobia y violencia.
E tacticanan aki ta engañoso, pasobra doctrina catolico ta expresa claramente cu bida humano ta sagrado y cu cada persona tin dignidad. Doctrina cristian ta enfatisa cu Cristo a muri na cruz pa cada persona, sin haci distincion a base di rasa, sexo, preferencia sexual of cualkier otro motibo. E uzo di separacion di iglesia y estado pa silencia personanan cu ta identifica nan mes como cristian ta un perversion grave di e idea cu e Iglesia y e Estado no por eherce autoridad den e asuntonan interno di otro.
Matrimonio ta sagrado
Segun doctrina catolico, e famia ta e fundeshi di sociedad. Famia fuerte y stabiel ta crea bienestar y e fibra moral di un pueblo. Si kibra e famia, henter nos sociedad ta cay den otro. P’esey Santa Famia di Hesus, Maria y Hose ta haya un luga asina special como modelo di famia y como ehempel di amor, obediencia y lealtad.
Ademas matrimonio ta un sacramento. E ta un convenio entre un homber y un muhe cu Dios mes a crea pa refleha e amor y unidad di Hesus cu su Iglesia. E propositonan principal di matrimonio ta e procreacion y educacion di yiu. E famia ta e prome scol y p’esey nos mester tin cuidao cu pretexto di otro cu kier “educa” nos yiunan, kitando e responsabilidad di mayornan.
E famia ta e “iglesia domestico.” Esaki ta nifica cu e hogar ta un luga na unda ta cultiva fe, ta practica oracion y na unda ta sembra balornan moral. Segun e enseñansa social catolico miembronan di famia mester sostene y cuida otro den tur aspecto. Asina famia ta bira e prome luga pa siña e importancia di cuida nos prohimo. Famia mester ta e prome luga pa siña compasion, husticia y solidaridad. Si nos kier un sociedad mas husto, mas resiliente y mas prospero, nos mester cuminsa na inverti den e famia.
MEP-AVP ta promove e agenda LGBTQIA+
P’esey ta tristo cu e mesun ministernan cu a dicidi pa bay den cassatie contra matrimonio homosexual, ta promove un maneho completamente anti catolico. Ainda nan tin e excuus cu nan ta social democrata, pero AVP realmente ta un desapunto total. AVP ta uza e Enciclica Rerum Novarum di Papa Leo XIII pa campaña cu e “Bon Comun”, mientras Mike Eman ta bay linea recta contra e doctrina social catolico bisando cu economia ta “mas importante cu matrimonio.” E realidad ta cu Desiree Croes y Miriam Tonk-Croes ta fluister den su horea pa prohibi e candidatonan Wendrick Cicilia y Dennerich Kelly di bisa algo pro-matrimonio tradicional, mientras Benny Sevinger, Mervin Wyatt-Ras y Mike de Meza ta hisa e bandera regenboog.
