Diamars mainta trempan, Ministerio Publico ta anuncia cu nan a detene Frederick P. ‘Freddy’ Every, kende un tempo tabata coordinador di Minister Benny Sevinger. Esaki ta den cuadro di caso Avestruz.
Den e caso aki tin dos persona cu ainda ta den detencion, cual ta Maria Leoncita Arends, acusa pa falsificacion, esta ‘valsheid in geschrifte’. Tambe ex-director di DIP, Franklin Abath tambe ta deteni.
Prome cu esey a detene yiu muhe di Arends, esta Rebecca Richardson y despues Jeff Franken, como tambe Gaby Werleman y su casa Ninosca Nuñez. Tur cuater ya caba ta den libertad.
E CASO AVESTRUZ
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
