Durante e paradanan di carnaval hopi biaha nos ta mira e caranan conoci, entre otro mandatario, parlamentario, director di un empresa estatal, entre otro.
Pa hopi aña por mira e director di SETAR, ir. Roland Croes, ta forma parti di Los Laga Bai. Pero como participante di carnaval, e ta haciendo esaki pa mas di 40 aña. Cu Los Laga Bai tin algun biaha e no a participa, pero semper e ta bek cu nan. Prome cu el a cuminsa join e grupo, el a cuminsa cu tocamento den grupo di brassband, di cual el a forma parti dje trompetistanan.
Marriott & Stellaris Casino tabata presente den e paradanan di Carnaval 69. Yazira Javois-Feliciana, gerente di mercadeo Stellaris Casino, a expresa cu nan tabata promove e campaña di Scan & Win, unda cu hopi hende a gana hopi premio. Yazira Javois-Feliciana tabata hopi contento cu e resultado y di por a disfruta di Carnaval 69.
Patrick Melchior, participante di Los Laga Bai, a expresa di tabata pasa hopi dushi, e ambiente di Los Laga Bai tabata sumamente grandi y no por surpasa. E biaha aki a conta cu mas di 300 participante y e ambiente tabata unico. E ta conseha pa gosa di e carnaval y conscientemente, pero pa no haci di mas. Tambe pa percura cu esaki ta e forma di biba Aruba su cultura di manera hopi sano.
Lorna Varlack, carnavalista, a pasa un momento dushi cu e participantenan di grupo di Los Laga Bai, unda el a baila un rato cu nan. El a expresa di a participa hopi biaha den carnaval, pero otro aña, Carnaval 70 e lo t’ey cu Los Laga Bai. Pa dos aña sin carnaval, el a expresa cu esaki a bay bon y hopi hende ta contento di ta afo un biaha mas.
Lienchie Merryweather, lider di Champagne, a expresa di ta satisfecho cu loke nan a presenta riba caminda. Durante parada, den e seccion di massa tabatin 500 y algo di participante, mientras e parti di dilanti tabata 70. Nan a bay cu ocho seccion di cual a habri cu e ticket booth unda ta bende ticket y asina habri pa diferente show di broadway. Tabatin diferente show y patras por a haya e parti di e taxistanan.
