Contrario na ayera cu tabatin solo cayente den e parada di San Nicolas, diadomingo e parada pabou di brug tabatin awasero pero asina mes e ambiente a contagia mirones cu e alegria y celebracion cu tabata biba memey di e participantenan, cu a haya falta di carnaval pa e ultimo dos añanan. Tur expectativa ta cu pa otro aña e cantidad di participante lo kibra tur record!
E parada di Oranjestad a cuminsa cu e grupo di SMAC na inicio di e parada grandi. Ey por a aprecia presidente di Stichting Maneho di Aruba su Carnaval (SMAC), Darren van Ommeren hunto cu e polisnan dirigiendo e parada y hasta Rey Momo. Tambe agencianan di auto, un radio emisora y e carosa di e cerbes oficial di carnaval 69, esta cerbes Chill.
Royal Carnival Group
E prome grupo tabata Royal Carnival Group, dirigi pa Kevin James, cu tabatin como tema di e aña aki “Players C69”. E grupo ta existi pa 14 aña caba y tabata esun di mas chikito e aña aki, cu solamente 100 participante y 25 ayudante. Por a nota e secuencia den forma di e Opening Banner, Massive Brassband Dancers, un total di 25 bodypiece cu e tema “Treasures of Dubai” sigui pa e banda NBO y su tras e massa consistiendo di unicamente 75 participante y sin lubida presencia di e Reina Grandi di carnaval.
Empire Carnival Group
E di dos grupo ta Empire Carnival Group, dirigi pa Queeny Bergen, cu e tema “Festivals”. E grupo ta existi desde aña 2014 caba y a conta cu 322 participante. Prome cu e massa, nan tabatin varios seccion, manera esun di Ultra, Cherry Blossoms, Tomorrowland y Coachella. A sigui e banda Buleria cu semper a compaña e grupo y su tras e massa di 300 participante.
Touch of Brasil (TOB)
E di tres grupo, esun di mas grandi e aña aki, ta Touch of Brasil (TOB), dirigi pa Lisette Cheung, cu tabatin e tema “Asi es mi Peru”. E grupo ta existi pa 25 aña caba pero bou di e nomber TOB pa 23 aña. Nan a cuminsa sin nomber como participantenan di ex-Tivoli pero na aña 2000 a participa cu e tema Touch of Brasil y a dicidi di keda uza e nomber ey tambe, te awe. Pa e ultimo cinco añanan consecutivo nan a gana e premio di Grupo di Aña. E aña aki a conta cu 655 participante, parti den diferente sesion cu bodypiece, roadpiece y shoulderpiece. Nan ta e unico grupo cu a presenta cu dos banda musical, pa sigura cu musica y ambiente no ta caba na ningun momento. E bandanan ta Groove Masters y N’ Fuzion. TOB tabata anfrition di e Reina di Colegio Arubano tambe cu a scoge pa uni na e massa di mas grandi. Sin duda locual a engrandece e grupo aki ta e partnership cu Marriott Casino y cu turistanan di Windcreek (Renaissance) cu tambe a join.
Infinity Carnival Group
E di cuater grupo den e parad grandi di Oranjestad tabata Infinity Carnival Group, dirigi pa Julissa Hernandis, cu e tema “Jubilee”. E grupo ta existi pa cinco aña caba y a conta cu 200 participante. Dilanti nan tabatin un seccion chikito, sigui pa nan banda di semper, Delicious y nan tras e massa grandi di participante.
Champagne Carnival Group
E di cinco grupo den e parada grandi di Oranjestad tabata Champagne Carnival Group, dirigi pa Lienchie Merryweather, cu tabatin como tema di e aña aki “Broadway”. El a resulta e di dos grupo mas grandi den carnaval 69 cu un cantidad di 540 participante. Sin duda e carosa cu nan reina Shiki a hala masha atencion. Su tras a sigui e seccion di Lion King, den cual participantenan a bisti bodypiece y shoulderpiece. Nan tras a bin e seccion Wizard of Oz cu bodypiece y un mini roadpiece. E seccion “Broadway Visitors” a conta cu participantenan bisti cu masha bunita shoulderpiece. E seccion di Cinderella tabata tur na bodypiece, cu sigur ya resalta pa nan creatividad y luho. E ultimo seccion tabata esun di “Phantom of Opera” cu tambe tabata consisti di solamente participantenan cu bodypiece. Despues di e seccionnam, a sigui e banda Tsunami y nan tras e massa di participante mes. Ta bon pa menciona cu e aña aki Grupo Champagne a celebra 25 aña di existencia.
Los laga bay
E di seis grupo tabata Los Laga Bay, dirigi pa Joanne Croes, cu e tema di e aña aki “Umoja”. E grupo ta existi pa 39 aña caba y a conta cu 350 participante e aña aki. Ta bon pa menciona cu Los Laga Bay a bira un famia y ta e mesun participantenan ta regresa tur aña. Remarcabel ta pa mira con e generacion nobo, esta yiu y nieto di e prome participantenan awendia ta sigui cu e tradicion. Nan tambe tabatin un seccion pero e gran massa a baila, manera ta pa hopi aña caba, riba e ritmo di Robert y su Solo Banda Show…un di e unico bandanan cu ta toca “live” den carnaval, sin uza mashin of computer.
Pa finalisa tabatin di Grupo Loco Loco Noord acompaña pa Family and friends pan lovers y un carosa. Ambiente di last lap tabata den man di Youth Xtreme.
