Dia 30 di april ta Dia Internacional di Jazz, un dia special pa resalta jazz y su rol diplomatico cu ta uni tur hende rond mudo. E ta designa oficialmente pa United Nations Educational, Scientific and Cultural Organization (UNESCO) na november 2011.
Dia Internacional di Jazz ta presidi y dirigi pa e director general di UNESCO Audrey Azoulay y e legendario pianista y compositor di Jazz Herbie Hancock cu ta fungi como UNESCO su Embahador di Bon Boluntad y President di e Herbie Hancock Institute of Jazz.
“Cu conflicto y division den hopi parti di mundo, e ta mi deseo cu a traves di e lenga universal di jazz, nos celebracion e aña aki por inspira hende di tur pais pa sana y pa tin speransa y pa traha hunto pa asina sostene paz”. Tabata e palabranan di Herbie Hancock, embahador di bon boluntad di UNESCO.
Tabata na 2006, Carlos Bislip a cuminsa cu e Carlos Bislip Jazz Expo. For di e tempo ey pa awo, mas di 20 hoben cu a cuminsa cu nan presentacion den e expo aki, a logra bay sigui cu nan estudio den exterior den e genero di Jazz. Durante añanan el a bay diferente luga.
DIA INTERNACIONAL DI JAZZ 2023
Den un entrevista, e musico Carlos Bislip a informa cu riba dia 30 di april, na nivel mundial, ta celebra Dia Internacional di Jazz caminda Aruba ta preparando cu esaki cu e presentacion di diferente grupo.
E aña aki y pa e proximo cinco añanan, Carlos Bislip Jazz Expo lo bay destaca ‘Women den Jazz’, es decir e rol di hende muhe den e genero di musica Jazz. Pa esaki a invita dos dama, uno di Boston, trompetista y uno di Indiana, cu ta saxofonista cu lo toca den su tres presentacionnan. Ambos tin estudio avansa di jazz y nan lo toca cu e alumnonan, Caribbean Combo y nan lo ta e prome agrupacion di Bislip cu lo toca e anochi aki.
Tur diasabra mainta nan ta reuni na Scol di Musica Rufo Wever. Caribbean Combo su repertorio ta enfoca riba ritmo di nos region cu ta priminti di ta un presentacion basta “spicy”. egundo presentacion di e anochi lo ta e grupo di Eric Jan Eman and The Groove Hunters cu lo toca un repertorio funky cu enfasis riba improvisacion. Despues di “The Groove Hunters” lo ta e presentacion di e Carlos Bislip Quintet, cu lo duna homenahe na e “Bebop Era”. E etapa di jazz aki ta caracterisa pa tema cu tempo hopi lihe, improvisacion aventurero, harmonia complica y cu un enfoke den virtuosismo individual. E formato comun di e “Bebop Era” ta piano, bass, drums, tenor sax y trompet
Siguientemente lo haya e Reno Steba cu su grupo Oruba cu ta conoci di ta e musica tribal di Aruba. E musica di Oruba tin su reisnan den e tradicion folklorico, nativo y di jazz di e musica Caribeño. Bislip a comenta cu e experimenta cu Steba ta haciendo cu e musica di Aruba y su vision artistico ta algo hopi unico, anto cu e ta sumamente contento di tin Steba entre e artistanan di e edicion aki di e Carlos Bislip Jazz Expo.
Pa finalisa e celebracion di Jazz Appreciation Month y International Jazz Day di 2023, Bislip a puntra Franklin Granadillo pa duna un presentacion demostrando su maestria como compositor y areglista. Granadillo lo deleita e audiencia y e siguidonan di e Carlos Bislip Jazz Expo cu un repertorio cu lo consisti di algun cancion original y di nos folklore tradicional, pero den un bachi nobo.
Ora Bislip a yega Aruba, el a cuminsa organisa e celebracion di Jazz Appreciation Month “JAM”na Aruba cu a tuma luga den e sala chikito na Cas di Cultura. Pa e siguiente 5 aña el a haci e celebracion dilanti Biblioteca Nacional Aruba (BNA)unda el a pone e hobennan toca hunto cu musico profesional. Despues di BNA e celebracion di JAM a bay varios luga manera dilanti di Cas di Cultura, Plasa Turismo, Renaissance Market Place, Alhambra Mall, Casibari, Plaza Daniel Leo y Scol di Arte.
RESERVA
Bislip a expresa cu jazz ta e idioma internacional cu ta comunica comunidadnan cu otro, pa e motibo ey UNESCO a declara e dia 30 di April como e Dia Internacional di Jazz “UNESCO a ripara cu mas cu otro musica jazz ta conecta humanidad cu otro y p’esey mi kier invita full pueblo di Aruba pa bin presencia un momento hopi unico unda bo ta wak hobennan ta toca cu profesionalnan di afo y e biaha aki e mescla di e lineup di artistanan ta bay ta hopi varia, e ta bay ta un anochi hopi unico den cual e actividad aki ta bay ta gratis y si personanan kier reserva nan luga, nan por yama na Kulture Cafe na 280 5566 pa nan por haci un reservacion.
UNESCO a decreta e dia na aña 2011, cu e obhetivo di duna di conoce un movemento musical di un balor educativo grandi, asina como e recurso valioso cu ta contribui na intercambio cultural, dialogo y cooperacion entre e pueblonan na nivel mundial.
Carlos Bislip kier invita tur e siguidonan di Jazz pa no perde e oportunidad aki pa bin na Kulture Cafe na San Nicolas riba 30 di april for di 7:00pm te cu 10:30pm.
