Mi anhelo ta di por a cuminsa cu algo positivo mirando cu nos ta na comienso di un aña nobo pa presenta na pueblo, pero ta dificil pa papia bunita, manera nos mandatarionan a bin ta haci den nan mensahenan di fin di aña. Tras di e cortina di e bunita palabranan tin un realidad tristo ta scondi di e casonan cu nos por considera alarmante. Pero nos por mira, cu mientras cu gobierno ta hunga wega di Caco Scondi, nos Parlamento ta na soño y pueblo ta esun cu lo sufri e consecuencianan.
Si nos mester kere nos mandatarionan, Aruba lo para bira e Dubai di Caribe. Den su speech di fin di aña nos prome mandatario ta pinta un futuro super briyante cu e inversionnan riba diferente tereno, entre nan atencion pa e situacion di e adulto mayor.
Nos flamante minister di medio ambiente mescos cu e prome mandatario ta exigi spotlight cu proyectonan cu lo nifica un mehoracion di nos flora y fauna. Nos minister di educacion ta señala e empeño di e gobierno pa drecha nos scolnan y e minister encarga cu energia ta caba di buta e cherry riba e bolo. Diripiente tin atencion atrobe pa nos refineria unda ta expresa e posibilidad cu e lo por bira un “upgrader”!
Ta obvio cu gobierno ta trata na tur sorto di manera pa evita papia riba e scandalnan cu e ta confronta cu n’e. Na prome luga nos mester constata cu ningun di e proyectonan lo tin un balor agrega pa e situacion penoso cu un gran cantidad di nos pueblo ta experenciando. Nos grandinan mester sobrevivi cu un aumento marginal di entrada (esaki conforme ley y ningun sorto di fabor), mientras e prijsnan ta sigui aumenta. E meta tras di e atencion pa e grandinan ta obvio. E grupo ta consisti di casi 25% di nos poblacion y tur tin derecho di voto, pues un “target” importante prome cu eleccion.
Si mester kere esunnan cu ta traha den Enseñanza, Educacion “ligt op zijn gat.” E docentenan ta expresa nan preocupacion y si haya un oportunidad ta bandona nos isla. Kico realmente a haci pa mehora e situacion: NADA.
Nos minister encarga cu energia diripiente tin atencion atrobe pa nos refineria unda ta expresa e posibilidad cu e lo por bira un “upgrader.” Pakico a nombra un familiar como director di RDA? Tabata tin un “open sollicatie procedure?” Ta berdad cu e ta strica 30 mil “heldo” pa luna!Con a para cu e MoU firma cu Eagle LNG? Unda e plan pa instala un planta hydrogeno a keda? E ta un Fata Morgana tambe?
Pa awor sin embargo ta e minister di medio ambiente ta “span de kroon.” Atrobe hues den su sentencia ta bati pisa riba dede di gobierno y e minister den e caso cu Amsterdam Manor a cuminsa pa motibo di e mal holo di Bubaliplas. Awor tambe e turistanan a cuminsa ta manifesta nan disgusto cu e holo desagradabel. Y kico e minister ta haci banda di habri e sluis, ta saca mas potret. Pa di tantisimo biaha gobierno a perde e casonan encuanto e falta di solucion debido di e dump na Parkietenbos.
Nos por sigui gaba cu tin un desaroyo tremendo di turismo, pero e entrada parce di lo mester ta uza pa paga no pa drecha RWZI y dump, pero pa paga e boetnan cuantioso cu hues ta determina. E minister parce no tin mucho preocupacion cu un posibel desaster ecologico si e RWZI disfunciona por completo. Y parlamento ta “muisstil.”
Nos ta contento cu e “Mededingingsautoriteit” tabata acepta den Parlamento y nos ta spera cu esaki no djis bay fungi como un “window dressing.” Ta di spera cu e autoridad aki realmente bay caba cu e “cartelnan”(prijsafspraken) cu tin y investiga e proyectonan cu ta mustra cu kier ta hinca den “doofpot.” Aki tin hopi “hushmoney.”
Y nos Parlamento den tur tormenta aki ta den un soño profundo cu no ta ripara cu ta un “boter di awa bashi” ta presenta na e pueblo cu obviamente tin un sed mortal.
