Awe mainta algo pasa di 10:00 am a bati alarma pa un candela grandi den Caya Ing. Roland Lacle. Ey a topa cu un cas bandona, probablemene habita pa adictonan, cu tabata completamente na candela. E vlamnan grandi tabata crusa e cura cu ta separa e cas y St. Michael Paviljoen. Esey a haci cu bomberonan, cu a presenta na e sitio cu dos unidad, mester a comparti e trabou entre combati e candela y evacua nos grandinan.
Mester menciona cu e cas ta bastante bieu y ta un combinacion di un caso di piedra hunto cu un pida di palo, cu a bin acerca estilo di un “bijbouw”. Esey a pega candela prome y a crece te pega e otro parti tambe na candela. Bomberonan ta kere cu ta adictonan a peg’e na candela, door di artefactonan cu ta utilisa pa por uza droga. Trahadonan di SABA a percura pa evacua decenas di cliente for di St. Michael Paviljoen pa San Pedro de Verona. Te ora cu a domina e candela completo y no tabatin molester mas di huma, a hiba e clientenan bek pa nan cas di cuido original.
Tin un relato extenso di e candela aki, di e historia di e cas aki y di tur e esfuersonan haci di e trahadonan di SABA, den nos edicion di TREMPAN di mañan mainta.
