Diabierna anochi, Aruba Softball Bond a tene e ceremonia di apertura di e campeonato internacional di softball femenino “Campeonato di CONSURSA” na Dragon Hitters Balllpark.
A tene un desfile di tur e paisnan participante na e torneo, esakinan Argentina, Brasil, Corsow, Peru, Venezuela y Aruba. Presidente di Consursa, Sr. Antonio Morales a elogia Aruba Softball Bond y Sr. Endy Croes pa e tremendo trabou desplega.
Pa cu esaki tanto sr. Croes como Sr. Chipen Chirino a haya un bunita reconocimento como muestra di aprecio pa nan gran labor y contribucion na e deporte di softball den su totalidad. A tira e prome bala pa asina oficialisa e torneo di Consursa. Aki miembronan di Parlemento di Aruba, Sra. Shailyni Tromp Lee como pitcher y Sra. Sue Ann Ras como bateador a haci e apertura.
E Confederacion Suramericano afilia na World Baseball and Softball Confederation(WBSC) a duna Aruba e honor pa ta cede di e campeonato internacional di softball femenino. Mester bisa cu pa prome biaha Aruba ta organisando un campeonato di tal magnitud den softball femenino. Pa loke ta e seleccion di softball femenino di Aruba nos tin cu bisa cu nos damanan ta completamente prepara pa e torneo aki. Aruba tin algun hungador local biba den exterior cu a bini y reforza e seleccion. E staf di coaching di Aruba ta consisti di Rayborn Didder, Carmelita Haynes, Estefano Croes y Coach Luis Pire.
E weganan di Consursa ta sigui henter siman na Dragon Hitters y na Pos Chikito Ballpark. Ta invita henter e Pueblo di Aruba pa pasa y apoya nos seleccion femenino y mas cu claro disfruta di algun bon wega di nivel halto di softball.
Lotto, e loteria di Aruba pa medio di Stichting Sportsubsidie Aruba a yuda subsidia e torneo internacional di softball Consursa organisa pa Aruba Softball Bond na Aruba
Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
