E siman aki A.T.A. ta lansa e campaña di consienticacion: Ban Serio! A base continuo Aruba Tourism Authority ta dirigi su atencion na e comunidad local tambe.
Den e contexto aki ta percura pa mantene comunidad local informa di iniciativanan, resultadonan y aspectonan importante rond nos turismo, pero tambe ta conduci estudio, ta colecta data, y organisa encuentronan publico. Banda di locual ta haci internacionalmente, den combinacion cu investigacion y estudio riba nivel local, A.T.A. a delinea claramente e pasonan necesario pa desaroyo na un manera duradero di e producto turistico ‘Aruba’.
E informacion aki ta entre otro obtenibel den e plan ‘Cu Mira pa Futuro’ (www.cumirapafuturo.com). Pasonan necesario mester bin di parti di A.T.A., gobierno y otro instancianan, pero nos comunidad mes tambe mester wordo consientisa pa asina carga y contribui na e desaroyo duradero aki. E meta di Ban Serio! ta pa enfoca entre otro riba con nos comportacion como cuidadanonan tin consecuencia directo y indirecto riba temanan manera:
- Medio Ambiente
- Hospitalidad
- Cultura y
- Seguridad
E cuatro topiconan aki a wordo identifica como e areanan cu mester atencion special di tur socionan den turismo como tambe nos comunidad local. E puntonan aki tin impacto riba Aruba como un producto turistico y tambe riba e bida di nos hendenan local, y mester (sigui) duna atencion na esakinan.
Ban Serio! kier trece atencion y concienticacion riba e 4 puntonan aki na e siguiente manera:
Medio Ambiente, specialmente e sushamento di nos lama, beachnan y areanan publico lo ta sigur un punto di enfoke. Den e ultimo añanan nos por a mira varios di nos hendenan drenta den accion pa medio di entre otro iniciativanan nobo manera Blue Blocks Aruba y Plastic Beach Party. Ban Serio! kier uni na movecionnan asina y inspira y facilita nos comunidad door di ofrece ayudo, guia y door di comparti conocimento di con cada un hende riba su mes por reconoce nan impacto riba e medio ambiente di Aruba y asina aporta na mehoracion den formanan facil y sostenibel.
Hospitalidad, aki ta papia specificamente di Aruba su cordialidad y amabilidad cu ta locual nos isla ta mundialmente conoci p’e. Ban Serio! kier (re)captura y enfatisa Aruba su cordialidad. Esaki por wordo haci door di simplemente recorda tur hende cu un simpel “Bon Dia” – “Con ta bay?” y “Feliz Dia” entre otro ta palabranan cu por trece cambionan positivo den nos bida sin importa bo edad of clase socioeconomico. Ta norma y balornan cu no mester bay perdi y mester wordo stimula y cuida.
E Cultura di Aruba y tur su aspectonan positivo y bunita ta semper presente den nos bida diario. Door di e ritmo di cada dia, hopi biaha nos cultura ta pasa band’i nos sin cu nos ta aprecia suficientemente loke ta di nos. Ban Serio! kier encurasha nos comunidad riba e union multicultural y mustra e variedad grandi di tur aspecto pero tambe e dinamismo di nos cultura.
Seguridad ta mas cu un tema principal den corantnan y social media. Ban Serio! kier enfoca riba pasonan di prevencion cu nos tur por tuma. Ban aumenta e seguridad di nos isla y minimaliza ladronicia, atraco y accidente di trafico cu concientisacion di e efectonan negativo cu esaki ta trece.
Sigui Ban Serio! riba Facebook y Instagram y participa na e combersacion riba e topiconan importante menciona. Abo tambe ta forma parti di e cambionan aki y ta hunto como un comunidad nos por percura pa concientisacion y accionnan necesario pa cu nos Medio Ambiente – Cultura – Hospitalidad y Seguridad.
