Un biaha mas aeropuerto su operacion a keda afecta pa forsanan ajeno na nan boluntad diahuebs den oranan di atardi. E biaha aki cacho tabata responsabel. Aruba Airlines su vuelo AG503 tabata programa pa lanta vuelo pa 16.45 di atardi. Sinembargo na momento cu nan tabata riba pista caba cu motor cendi, toren ta avisa pa wanta e salida pa motibo cu a señala algo riba pista.

No tabata trata di hende, sino dos cacho di caya, cu a subi pista. Segun por a compronde, nan a subi pista pasando via di e area di construccion. A tuma un rato pa core cu nan y saca nan for di pista. A tuma medida na e area unda cu nan a drenta pa evita cu esaki ta ripiti.

E sucedido a causa cu e vuelo di Aruba Airlines a lanta vuelo 14 minuut despues di e horario programa. No ta conoci si esaki ta motibo tambe cu e siguiente vuelonan a sali cu entre 8 y 10 minuut di retraso.

Den pasado a yega di sosode algun biaha cu cachonan a subi pista y recientemente e operacion di aeropuerto a keda afecta ora cu a cera pista pa motibo cu un ilegal a huy for di Guarda Nos Costa y no tabata conoci si el a crusa e pista.

Comments

comments