Mike Eman: Gabinete Wever-Croes a perde mas legitimidad

Den un entrevista for di Cas di Partido e ex-prome minister di Aruba y lider di partido AVP ta traha, sr Mike Eman a duna e siguiente declaracion relaciona cu e retiro di e miembro di Parlamento sra. Daphne Lejuez for di e fraccion di MEP. Cu esaki e coalision di e partidonan MEP POR y RED a bira uno cu un sosten minimo.

A puntra sr. Mike Eman su opinion riba e situacion politico dificil aki. Esaki tabata su contesta: “Ayera Aruba a biba otro momento den e crisis constitucional den nos pais. Na e momentonan aki nos tin un situacion unda entre gobierno di Reino y e gobierno di Aruba tin un situacion cu Gobierno di Aruba a firma un acuerdo pa  cumpli cu e leynan necesario pa CFT por funciona.

Mike Eman: Gabinete Wever-Croes a perde mas legitimidad

Posted by 24ora on Thursday, November 14, 2019

Pero miembronan di MEP den Parlamento di Aruba a haci cambionan grandi den e ley cu a haci cu Hulanda a keda sumamente decepciona. Na mes un momento nos ta mira cu tin un reduccion dramatico di e apoyo di e gobierno aki den parlamento. E legitimidad di gabinete Wever-Croes ya ta wordo cuestiona, pa motibo cu e sosten cu e tres partidonan di e coalision a haya, tabata a base di promesanan cu no a wordo cumpli.

Nan a papia di reduci e edad di pensioen, a papia di ta baha gastonan, cu lo bay introduci ayudo pa poder di compra di pueblo, cu lo bay baha prijs di awa, di electricidad y di gasolin. Nos ta mira cu niun di e promesanan aki a wordo cumpli. Pa e motibo ey ya caba nos comunidad y cientificonan constitucional ta bisa cu e gobierno aki ta basa riba engaño electoral. Cu esey e gobierno aki a perde caba su base moral y legitimidad pa por bisa cu nan ta representa e electorado. E legitimidad di e gobierno aki a bira aun mas fragil, awor cu nan sosten den parlamento ta consisti di unicamente di un asiento. Ora e gobierno a wordo forma, gobernador a duna e formado di gobierno e encargo pa forma un gobierno a base amplio. Awor nos ta wak cu e gobierno aki no tin e base amplio mas. Esaki ta un otro interogatio hopi grandi tras di e legitimidad di e gobierno di MEP POR y RED, banda di e engaño electoral”

INTIMIDACION DIRECTO

Banda e esaki tin un otro sucedido cu a tuma luga ora di e retiro di e miembro di parlamento sra. Daphne Lejuez, cu ta preocupa e lider di AVP. Mike Eman:”Nos a mira un declacion di prome minister Wever-Croes, cu a lanta hopi hopi preocupacion den nos comunidad. Mi tin literalmente loke ela bisa akinan. E tipo di declaracionnan aki ta e tipo di menasanan cu nos ta biba cu nan caba for di momento cu e gobierno aki a tuma su posicion. Nos a mira un persecucion politico di un cantidad di persona cu a wordo retira. Nos a mira persecucion politico di periodistanan critico di e gobierno cu a hasta wordo persigui penalmente y despues a resulta cu no tabata tin nada. Nos ta wak cu politiconan ta wordo persigui cu influencia politico den nos sistema hudicial. Y awor nos ta mira cu hasta e prome minister ta bay asina leu pa dirigi un menasa directamente na un miembro di parlamento cu tabata tin e curashi di para pa su propio punto di bista.”

Un Prome Minister, obviamente rabia, a haci un declaracion espantoso den e mes un liña di persecucion, pero ela hib’e un grado mas leu.Mike Eman: Mi ta cita literalmente loke señora prome minister a bisa: “Cos hopi importante pa tene cuenta cun’e ora un parlamentario bira independiente na Aruba ta cos serio nos ta papiando didje. No ta wega manera nos a bisa awor ey. No ta wega di Barbie, wega di jaks. E cos aki ta hopi serio y mi ta spera cu cada ken cu ta haci’e sa kico e ta haci cu su curpa.” E palabra curpa aki ta hopi importante, pasobra e ta sigui cu e ultimo frase aki: “Kier men no bin yora mayan cu e hendenan di MEP a rabia, pasobra ora Bo tuma un desicion den bida, para pe, para responsabel pe.” Mike Eman: “Minister Presidente Wever Croes ta asocia un menasa pa cu e curpa y integridad fisico di un hende cu e hendenan rabi’a di MEP. E ta hopi cla, cu sea Bo ta menasa e persona cu hendenan rabi’a di MEP of Bo ta invita e hendenan rabi’a di MEP pa haci algo fisico pa cu e parlamentario. Cua di dos interpretacion cu Bo por tin den e declaracion aki, tur dos ta espantoso y condenabel. Pesey awe den nomber di partido di Pueblo Arubano AVP, cu a bida e historia di violencia y persecucion, nos ta condena e declaracion aki.”

Mike Eman a sigui bisa: “No ta por nada nos ta den Avenida Alo Tromp, e nomber di e hoben cu riba un dia di eleccion, bisti den un flanel berde, a wordo asesina door di e mes un ambiente aki. Un ambiente di pidi hende pa tuma accionnan cu ta bay hopi hopi leu. Ora mi tende loke sra Wever-Croes ta bisa Bo curpa ta co’i ril. Pasobra MEP ta bolbe crea un clima di intolerancia y violencia pa cu opinion di otro hende, ora esaki ta diferente cu esun di Bo. Nos ta condena esaki!!!

IMPARCIALIDAD DI HUSTICIA

Mike Eman a bisa tambe esaki: “Nos tin hopi pregunta riba e imparcialidad di nos sistema di husticia. Na e momento aki e ta preocupa nos aun mas ora un prome minister por haci un declaracion asina y nos no ta mira cu accion ta wordo tuma pa cu un invitacion sea pa un accion fisico pa cu curpa di un miembro di parlamento cu ta critico, of un mensa pa accion fisico contra curpa di un miembro di parlamento cu a para pa su opinion politico. Nos ta condena esaki. Nos ta expresa nos solidaridad cu sra Daphne Lejuez. E no ta miembro di nos partido. Pero nos ta kere cu cada miembro di parlamento, cada ciudadano di Aruba merece e proteccion y merece di tin hende cu ta para banda di nan ora nan para pa expresion liber.”