Na Marriott hotel na Den Haag a tuma lugar un recepcion den cuadro di celebracion di Dia di Himno y Bandera di Aruba. Minister Plenipotenciario Guillfred Besaril y sra. Siglaine Besaril-Wever a ricibi diferente invitadonan, manera presidente di Eerste Kamer Ankie Broekers-Knol, minister Plenipotenciario di Curaçao Anthony Begina, minister Plenipotenciario di suplente di St. Maarten Hasani Ellis, vice presidente di Raad van State Piet Hein Donner, presidente di Hoge Raad Maarten Feteris, Comisario di Reino di Utrecht Willibrord van Beek, miembronan di Tweede Kamer Joba van den Berg di CDA y Antje Diertens di D66. Tambe un cantidad grandi di embahadornan di diferente pais Europeo y Latinoamerica a duna acto di presencia na e recepcion di minister Besaril pa cu Aruba su dia nacional.
E mandatario a wordo acompaña tambe pa Minister di Finanzas, Asuntonan Economico y Cultura sra. mr. Xiomara Ruiz-Maduro, Minister di Husticia, Seguridad y Integracion mr. Andin Bikker y Minister di Asuntonan Social y di Labor Glenbert Croes, cu ta na Hulanda pa un bishita di trabao
Durante di su discurso pa e invitadonan minister Besaril a duna un splicacion di e significacion historico di e fecha di 18 di maart pa Aruba. Tambe e mandatario a papia di e lucha di Status Aparte di Aruba cu a lanta cabes atrobe den e comienso di decada setenta na momento cu Betico Croes (dfm) a cuminsa cu su propio partido politico MEP. ‘Mientrastanto nos pais ta 32 aña bieuw, jong pero madura. E retonan sigur na comienso di Status Aparte no ta tabata facil. Pero e creencia den nos mesun forsa a haci cu semper nos a sabi di combati e retonan aki. Mescos cu ta e caso awor aki pa nos Gobierno cu tin cuater luna den gobernacion. Por ehempel finanzas publico. Mester baha e deficit, crea un surplus riba e presupuesto y cuminsa reduci e debe nacional. Esaki lo no ta facil, pero tampoco impossibel, manera nos a mustra den pasado. Cu e boluntad y e afan di henter nos Gobierno mi ta confenci cu nos lo logra. Nos empeño ta keda: nos mes por y unda mester lo pidi sosten di Hulanda,’ asina Minister Plenipotenciario Guillfred Besaril a bisa.
Tambe e mandatario a menciona den su discurso e maneho di Gobierno pa crea mas pilar economico banda di turismo. Besaril: ‘Pesey e enfasis di e gobierno aki ta innovacion. Di e manera aki nos por mas, cu menos espacio, mirando cu Aruba ta un isla chikito. Mi mision na Hulanda ta pa busca partnernan den e sector aki cu kier cana e mesun caminda cu nos. Nos por siña hopi di initiativanan di otro paisnan y sigur tambe di Hulanda. Nos Gobierno ta bai concentra hopi riba e sector primario. Cu technologia nobo y cu un otro enfoke mi ta mira oportunidad pa Aruba,’ asina e mandatario a bisa.
Finalmente Minister Besaril a hisa e glas y a brinda hunto cu e invitadonan riba un futuro briyante pa Aruba
E recepcion a sigi den un ambiente hopi ameno cu musica di e steelband di Francis y John Francis Jacobs.
