Ta den cuadro di nan celebracion di nan di dos lustro, e banda local Buleria ta na Hulanda pa dos presentacion. Claro, unda cu nos yiunan di tera t’ey, 24ora.com ta hunto cu nan. Director di Headlines Group, kende t’e cas editorial di 24ora.com y TREMPAN tabata den backstage hunto cu Buleria caminda a combersa cu nan riba nan presentacionnan na Hulanda. Rocco Franken kende ta un di e cantantenan principal di e banda a conta cu Buleria ta contento di ta bek na Hulanda y e biaha aki den friu.
Buleria celebrando nan di dies aniversario, por mira bek na dies aña di hopi musica, hopi fiesta, hopi celebracion y memoria cu lo keda pa semper. Jair Buddy Vesprey tambe ta forma parti di e front di Buleria. Segun Buddy, e ta sinti e crowd diferente na Hulanda compara cu Aruba. E ta casi un momento nostalgico ora cu e publico Arubiano y Antiyano ta topa cu nan banda local te na Hulanda. E ta un momento tambe caminda cu e Rubianonan ta topa cu otro, ta bin for di diferente ciudad pa bin un solo fiesta.
Ray a comenta cu, na momento a start cu e prome cantica e pista a yena. Locual a tuma nota di dje tabata cu tabatin hopi hende muhe den e fiesta den comparacion cu hende homber. Bo por pasa bon bo so tambe, no necesariamente mester tin un pareha, Ray a comenta.
For di aña pasa a ricibi invitacion pa forma parti di un fiesta caminda ta toca canticanan mas tradicional. A toca dos biaha caba den tipo di fiesta asina na Corsou pero esaki ta prome biaha cu Hulanda lo mir’e.
Aki por pensa riba canticanan manera somuntuno, balada, salsa etc. E ta un ambiente completamente diferente, aunke e ta un reportorio diferente. Pa cu e fiesta aki, lo tin un “guest star” special p’e publico na Hulanda. Ora ta celebra bo di dies aña di existencia, ta algo cu bo ta celebr’e henter aña. Hulanda a ricibi e prome fiesta, pero lo sigui pa Corsou, Boneiro y claro, Aruba tambe.
