Dialuna mainta parlamento a habri siman cu tratamento pa ley di codigo di procedemento legal, Strafverordening. E ley a pasa cu 16 voto na fabor, uno contra na fabor di Gerlien Croes, parlamentario independiente, y parlamentario Misha Raymond, lider di Fraccion Raiz a abstene di vota.
“Satisfecho cu parlamento a aproba e ley pa loke ta introduccion di e Wetboek van Strafordening nobo, un ley hopi importante cu na 2020 ya caba a keda aproba. Awe nos ta trata Invoeringsverordening, e ley aki ta bay duna e victimanan mas derecho, e detenidonan tambe, y lo facilita trabao di Cuerpo Policial pa haci nan trabao mas eficiente y eficaz”, segun minister Rocco Tjon ta declara.
Parlamentario Gerlien Croes a vota contra mas bien riba motibo cu e articulo Voorlopige hechtenis cu no lo drenta na vigor mesora. “Esaki lo drenta na vigor den un tempo mas despues pa nos por cumpli cu puntonan cu mester di atencion”, segun e mandatario. Ta trata di scarsedad di capacidad di detencion, un problema cu ta señala pa hopi tempo y cual gobierno ta trahando den un forma structura pa mitiga esaki segun minister Tjon.
Despues di e contestacion na primera tanda, a base di esey parlamentario Misha Raymond a bay over na puntra con e preocupacion ta keda existi pa loke ta derechonan humano di e detenidonan. Mirando un carta cu e parlamentarionan a ricibi for di Orde van Advocaten – cual pa colmo a pone poco retraso riba e reunion di dialuna mainta pa asina e parlamentarionan por a revisa esaki debidamente. Parlamentario Raymond a puntra si na un momento anterior of durante combersacion cu comision cu e preocupacionnan aki a sali bin dilanti. Si esey ta e caso, kico tabata e contesta of afspraak haci cu Orde van Advocaten. “No ta di discuti cu na momento cu ta cuestiona derechonan humano, mester tuma tur e pasonan necesario pa percura cu esaki no ta e caso,” parlamentario Raymond a declara den parlamento.
Pa mas lesa TREMPAN.COM.
