Atan Lee no ta un persona desconoci den comunidad. E tabata hefe di protocol un tempo di Gobierno y ta escritor di varios buki. Entre otro el a skirbi riba protocol y etiket, cu ta un best seller cu 6 mil ehemplar bendi.
Te ainda, segun Lee, ningun escritor di Aruba a bende tanto buki asina. E di dos buki cu el a skirbi ta “Den scoch’i mi mama”, no a bay dje exitoso manera cu el a desea, aunke cu ta trata aki di un buki educativo. “E shoco sabi” tambe el a skirbi pa mucha. “Exito ta den bo man”, el a publica tres aña pasa. Tur e bukinan aki ta educativo.
Como mucha semper e tabata tin un soño y hopi di nan a keda realisa. Pero un di e soñonan mas grandi, ta pa gana un premio riba tereno di literatura. Y esey no por logra na Aruba, debi cu nos no conoce e forma di duna un premio. A bin den Lee su cabes cu e soño aki, apesar di su 72 aña, a keda den su cabes, pa haci algo pa logra cu su soño bira realidad. “Un persona sin soño no ta un persona cu tin exito den bida.” E ta bias cu mester por soña di logra algo, di yega na algo pa bo tin exito. Esey tabata tur e exitonan cu e tabata tin.
Soñonan cu desde e tabata tin 13 aña, cu el a cuminsa soña y traha pa comunidad. Dado momento a bin den su cabes pa skirbi un novella. Su pensamento a cambia completamente di e parti educativo, pa bay den e parti mas romantico. El a skirbi un buki na Papiamento, titular “E mucha di Noord.” Traduci e ta “Het meisje uit Noord.” Asina el a traha riba dje pa un aña y mey largo. E mester ta un buki cu mester por haya confiansa di e cas editorial na Hulanda, sino nan no ta publik’e. Lee a laga traduci aki na Aruba cu ayudo di dos profesional. Despues a laga corigi’e pa un persona experto riba e tereno aki. A manda e buki Hulanda pa aprobacion, pa diferente cas editorial eynan. Un di nan a reacciona riba su peticion y a acepta pa publica e buki aki, cual pa Lee tabata un emosion hopi grandi ora cu na comienso el a haya sa cu nan ta cla pa cumpra full e dereho di autor for di Lee. Esey tabata algo caba, un inicio di un soño cu e tabata tin. Por fin e buki ta riba mercado Hulandes, na elgica, pero tambe e ta obtenibel na Inglatera, Merca y Austria.
Den e contract cu Lee tin, ta para cu cu e mes no por bende e buki. E mester bay via un libreria. A papia cu Plaza Bookstore, cu ta bay bende e buki, p’asina hendenan di Aruba, tambe por les’e.
Na Papiamento, Lee a laga dos hende di Biblioteca les’e. Esey a sosode na inicio y nan a desconseh’e pa publica e buki. “Mi kere cu nunca mester give up, y mester lucha simper den bida. E prome paso bo por faya, pero bo ta gara di dos sigur.” E ora Lee a acerca defunto Jossy Mansur, un escritor, periodista, y linguista conoci y tambe Ramon Todd Dandare, pa nan por a tira un bista riba e buki pa duna un conseho si por publica e buki. Tur dos experto a dun’e e conseho pa publica e buki. E ta un buki cu lo tin bon acogida. Asina Lee a haci y en berdad, door di a sigui nan conseho, awe e buki ta riba mercado.
No ta facil. Hopi hende ta pensa cu esaki ta facil, pa un cas editorial na Hulanda, tuma un buki di un escritor nobo pa nan, pa nan por publik’e. Lee ta asina orguyoso cu Nova, pasobra a bay riba internet y a keda conclui cu nan ta e cas editorial mas grandi di Hulanda, situa na Amsterdam. Su meta ta pa e buki bira un bestseller y gana un premio internacional. Pa e buki bira un bestseller, e ta conta cu confiansa den su pueblo.
Manera semper nan a dun’e e apoyo, cumprando e buki. Awor aki e ta solamente obtenibel na Hulanda. Pero ta spera cu pronto e ta na Aruba tambe. Na Hulanda tin miles y miles di Arubiano ta biba. Si nan tur apoy’e como un Arubiano, Lee por yega na su meta sigur. Esey ta su suplica na pueblo. Prensa ta voz di pueblo y sin nan Lee no por yega na pueblo. Door di nan ta pidi pueblo nan sosten. Pueblo a apoya Lee den tur su actividadnan y mester gradici pueblo pa unda cu e ta awe. Tur loke el a logra, ta danki na su pueblo, no na universidad, ni academia. Su pueblo tabata su universidad y academia. Tur cos den bida, tin un lucha p’e. Tin un proposito. Sino bo no ta logra nada den bida. Ta p’esey, Lee ta gradici prensa, di curason pa asina cubri y ta spera pa medio di prensa, pueblo por ta na altura di e buki aki cu sigur ta un bunita novela. Un novela cu henter e episodio ta hunga na Hulanda, entre dos Arubiano.
Ora cu un escritor namora di su obra, e ta un exito sigur. Lee ta super enamora di e obra aki. E tin fe grandi cu Dios lo yud’e. Lee ta un persona hopi creyente. E ta kere hopi den Señor y Mama Maria. Den e buki tambe e ta menciona cu danki na Mama Maria y Señor cu e por a logra skirbi e buki. Un biaha mas, cu apoyo di pueblo, e buki aki por bira un gran exito.
