Despues di algun dia di problemanan amoroso na cas y na trabou, awe mainta Minister Chris Romero a suspende su consehero principal, Luigi Bergen. A mand’e cas pendiente un investigacion interno riba un relacion amoroso cu e tin na oficina y cu ta causando problema na cas. Ey su señora a cuminsa publica varios asunto riba red social, cu de facto, ta atacha e reputacion y integridad di Bergen como Consehero. Awe Minister a dicidi cu ta basta y a manda Bergen y Brito cas.

E decision aki a cay na un momento masha inoportuno pa Luigi Bergen. Awe mainta, despues cu Sue-Ann Ras a tuma su retiro di Parlamento, a habri caminda pa Bergen sigui awo como Parlamentario. E hecho cu net awo MEP a bira lomba pe, ta pone cu e por hasta bira Parlamentario y bira independiente. Pa evita esey Gabinete Wever-Croes lo mester cambia actitud y reevalua si ta bay investig’e net awo pa un asunto sosodiendo den su bida personal.

E otro consehero suspendi ta Grabela Brito, hurista na Ministerio di Transporte Publico, Telecomunicacion y Sector Pimario. Ta acus’e di tin un relacion amoroso cu Bergen y como tal causando problema innecesario den e Ministerio.

Awe mainta Minister a manda ambos cas pa calma tensionnan den e oficina. E publicacionnan di e casa di Luigi Bergen riba Facebook ta causando berguensa pa e Ministerio y ta duna un impresion completamente diferente na locual e Minister mes lo a prefera.

Comments

comments