Habitantenan preocupa a lanta Fundacion Proteccion Commandeurs Baai

1610

Habitantenan na defensa y proteccion di e costa y bahia di laman di e area, cu ta keda na e costa di Isla di Oro te cu Zeewijk. Esaki ta conoci pa Commandeurs Baai.

Recientemente un grupo di habitante di Savaneta a dicidi di reuni pa lanta un fundacion. E motibo pa esaki ta cu pa basta aña habitantenan ta observando destruccion di nos bida maritime y saliña. Tambe pa conserva nos herencia di Savaneta.

Habitantenan di Savaneta y becindario a dicidi cu awor ta e momento di para huntu y firme pa pone un paro na locual ta pasando cu actuacion di algun hende cu ta kere cu nan por hasi y deshasi sin mas. Nan no ta respeta nos leinan manera prescribi. Ta hasi como si fuera e habitantenan di Savaneta no tin derecho di goza di nan naturalesa y no tin nada di bisa of no por hasi.

Wel union ta hasi forza. Tin cu mustra esnan cu pa añanan a hasi cosnan sin atene nan mes na leinan y cu a haci mal huso di e poder di ministernan cu tin cu cana e caminda legal manera tur otro ta hasi.

Durante e reunion hopi opinion valioso a bin padilanti. Tur e opinionnan aki mester wordo concretisa den e statutonan di e fundacion y esakinan ta:

Acceso pa lama.
Tur caminda mester ta habri pa un habitante por tin acceso na lama.
Hasta a papia pa bin cu un ‘boardwalk’.

No mas construccion
Absolutamente no kier mas construccion den nos bahia.
Nos kier un area unda nos por goza di nos trankilidad y serenidad. Unda nos por tin un bida di encuentro social cu nos hende nan y nos famia.

Proteha nos naturalesa.
Anuncio di Minister Marisol Lopez Tromp cu a firma e decreto pa declara e 16 area como areanan protehi ta duna nos e proteccion cu ni saliña y mangrove no mag wordo destrui.
Yuda e saliña regenera, y traha un linear park cu matanan cu ta biba banda di lama
Embeyese e area di Savaneta bandi di caminda y banda di costa.

Historia
Trese historia dilanti di tur cu a biba den y representa Savaneta

Despues di e lockdown y seramento di frontera, Aruba nos isla a haña e oportunidad di hala un rosea y libra di e avalancha di hende cu a apodera di nos isla. No libra di turista solamente pero tambe di esnan cu a mira e oportunidad di gana plaka riba custiya di nos isla su naturalesa. Ora nos a haña e oportunidad di sera nos portanan, nos a duna nos naturalesa e oportunidad di regenera y bira bunita bek manera antes. Nos a mira cu awor ta nos oportunidad di tuma nos Aruba bek den nos mesun man.

No laga e oportunidad aki pasa: Di drecha locual ta malo . Haci bon pa naturalesa pa e siguiente generacionnan.