Na fin di 2005 a tuma paso concreto pa caba cu e corupcion cu tabatin pa varios aña caba den e otorgamento di permiso. Den cuadro di esaki a firma un protocol pa evita cu e gobierno di e tempo ey haya un KB y na juli 2006 DIMAS a mira luz di dia. Historia a mustra cu for di e tempo ey no tabata tin ni corupcion ni excepcion. Tabatin un maneho estricto na unda e ARUBIANO tabata na prome luga. Mi persona cu tabata encarga cu DIMAS a demonisa no solamente pa mi contrincantenan, pero mas tristo ta pa mi propio coleganan.
E periodo di “ZERO CORUPCION Y ZERO EXCEPCION” a bin na su fin ora gobierno a cambia na fin di 2009. E corupcion a bolbe bira ordo di dia. Ta obvio cu minister Sevinger tambe a purba di pone presion riba mr. Kathy Paskel pa haci varios cos incorecto. Ora cu e NO a logra, el a pone su pionnan haci e trabou sushi p’e. Su pionnan Radhi Kahn y Mario Wever tabata esunnan encarga pa trece e era di corupcion y excepcion bek den otorgamento di permiso.
E tempo ey a manda varios carta na varios instancia, incluso Ministerio Publico, pero sin resultado. E fiesta den otorgamento di permiso a bolbe haci su entrada. E tempo ey a pone e Arubiano riba e “Highway 2 Hell”!
Ora cu na 2017 pueblo a kere cu lo pone un fin na e fiesta aki, nan a keda desapunta. E fiesta a sigui. E maneho di porta habri a continua y te hasta a saca e “Swiss-model” for di LTU. E actual minister di Dimas hasta a core un campaña invitando famia latino pa bin biba aki.
E tiki speransa cu pueblo tabatin cu por lo menos lo pone e Arubiano na prome luga, a bay perdi dia cu e gobierno actual a pone e cartera di Labor y Dimas den un solo man y pa colmo den man di e minister mas ANTI-ARUBIANO cu historia politico di Aruba a conoce, esta Glenbert Croes. Si Aruba tabata conoce un fiesta despues di fin di 2009 te cu 2017, minister Glenbert Croes a cambia esaki pa un “pachanga”!
Ora cu e minister aki a ripara cu cerca mr. Kathy Paskel NO tin luga pa desorden, e minister a inventa e argumento fofo cu e no tin confiansa den Paskel. Mescos tabata e caso tempo di ex-minister Sevinger, ata Mario Wever a bin den “picture” atrobe pa haci e trabou sushi pa su minister. Pa purba di camufla e persecusion politico aki, ata e minister ta bin cu un otro set di mucha manda den e asina yama “management team”! Cualkier mucha di kleuterschool por a constata cu e paso aki ta solamente pa e minister tin man liber pa por firma pa loco y cumpli cu su promesa den campaña.
Cu e paso aki a bira mas obvio cu e Arubiano ta riba e “Speedway 2 Hell”! E uniconan cu no tabata mira esaki ta nos Parlamento. E tempo ey caba nos a ripara cu e Parlamento a scoge pa keda keto. Un Parlamento cu tin nan boca yen di integridad y transparencia. E siman aki un hues a duna un sentencia hopi cla y raspa: UN RECHASO TOTAL DI PERSECUSION POLITICO! Kico Parlamento ta bay haci awo? Un biaha mas Parlamento lo scoge pa keda keto djis pa e stoel den Parlamento? Ta hopi straño cu particularmente esunnan cu ta sostene e gobierno aki, ta acepta e tipo di persecusion aki, no solamente den DIMAS pero te hasta den Parlamento mes.
Persecusion politico NO ta integro y mester rechas’e categoricamente. Ta di spera cu riba corto plaso Parlamento duna su pensamento riba henter e asunto aki. Un minister cu haci su mes culpabel na un persecusion politico asina obvio, mester retira. Si Parlamento NO rechasa esaki y core cu e minister, nan cera nan boca pa semper riba INTEGRIDAD Y TRANSPARENCIA!
