Despues cu UPP for di siman pasa a cuestiona e intencion real di e cambio den e ley entorno Serlimar, nos por a tuma nota un hala di reaccionnan cu mester ser cualifica como hopi infantil y no al caso. Reaccionnan cu ta mustra cu na un forma selectivo ta laga e memoria traha y haci comosifuera cierto acontecimentonan nunca no a sosode of cu nunca nan no tabata parti di esaki.
Asina nos por a tuma nota riba e declaracion di Otmar na unda eta bisa cu e cambio den e ley aki, no tin nada di haber cu e incinerator! Con e individuo aki por sinta gaña asina ey? Di berdad, e ta kere cu eta omnipotente y cu niun hende lo por desenmascare den su mundo di mentira y fantasia. E ta kere cu ta tur hende, segun convinencia, lo tin memoria di corto duracion.
Riba pagina 2 di e concepto di ley ta poni textualmente:
c. “beheren en exploiteren van een plant waar afval, die bestemt is om te verbranden in een grote, gesloten VERBRANDINGSOVEN, in onvangst wordt genomen,”!! Kico esey ta???
Wel un “grote, gesloten verbrandingsoven” ta un INCENIRATOR!!
E periodista no ta tuma su tempo pa averigua si e minister ta papia berdad pero ta acepta sin mas loke e minister ta bisa. Con bin? E tambe ta riba payroll of ta haya propaganda den su programa?
Esey ta djis un ehempel di e avalancha di mentira cu e minister a saca.
Despues e ta saca su gal riba e hecho den pasado mi a yama e famia, cu awor e ta den clinch cu nan, pa “La Familia”. Por ta e ta kere cu mi lo bai desmenti, manera e si ta haci ora e manipula, pero eynan e ta na e adres robes. Sinembargo loke nos a skirbi kico e consequencia lo ta pa e trahadornan cu ta traha na e compania ey, ta un realidad. Ni cuanto purba na desvia atencion, e lo no por scapa cu e rosea cayente di e hendenan ey ta den su nek. Hendenan cu e mes a yuda den su trayectoria ora cu e ta den AVPOR.
Algo hopi peculiar ta e hecho cu e ta hasi mencion di Aruba Bunita NV y ta hasi comosifuera cu e no tin arte ni parte den esaki. Con un hende por biba den un mundo di tanto mentira y tambe lubida cu e tabata un di nan hunto cu su amo Tico Croes tabata esnan cu kier a bin cu Aruba Bunita NV pa caba cu Serlimar!! Y awor kier bin pretende di ta e gran salbador. Otmar hunto cu “partners in crime” 8 aña largo a trata di caba cu Serlimar y e por purba di lolea otro hende pero cerca nos e ta na e adres robez. Pa casi 8 aña e tambe a permiti Benny Sevinger, Mike de Meza y Allan Howell como nan consehero, trata na laga Serlimar “bloedt dood”.
Y manera nos a bisa caba, aki ta bay pa e veneno cu tin hinca den e ley, esta di garantisa pa tur sushi ta bay “end up” na e incinerator di un compania STRANHERO. Un incenirator cu lo no ta “environment friendly” y na unda cu den mundo ta juist purba na deshaci di nan. Desde 1997 ningun planta a habri mas na Merca.
Un otro cu a purba di desvia atencion ta e flamante presidente di nos STEMPELPARLEMENT. E por rabia cuanto cu e kier pero hecho ta keda cu Otmar a bolbe pasa nan un bofta. Nos tur sa cu Otmar tin hopi pura pa e ley aki pasa, no solamente paso e kier keda cu su Serli-bank, pero mas bien ainda e kier pa e compania STRANHERO haya e MONOPOLIO riba e desperdicio cu Aruba ta produci. Y Otmar “doodleuk” ta bisa cu ta parlamento a dune tiki tempo!! What a thing! Haciendo esaki ela hunga YO-YO cu e presidente y pa colmo bisa tambe cu E LO scohe cua pregunta e ta haya importante y cua no!! Ora bo tende e presidente papia bo mester yega na e conclusion cu berdad cu e mester di e oxigeno pa e sobrebibi. Kizas e tambe mester bay uza Oxy-plus!
Ora bo tende e minister y e presidente papia, na unda nan ta haci comosifuera cu no tin pura tampoco, pasobra nada di e incenirator ta ser regla den e ley aki,e ora bo mester puntra bo mes, dicon no ta laga loke tin di haber cu e incenirator y e Serli-bank pa mas despues?
Claro cu esey lo no por!! Aki un paar siman e compania STRANHERO “handpicked” dor di e minister via un “fixed-bidding” mester entrega nan “oferta”! Sin e siguranza aki den e ley, atrobe NIUN compania lo entrega nan oferta. Si e presidente no kier pa nos usa e palabra STEMPELPARLEMENT, bin cu cambio den e ley cu lo no bai previlegia e compania STRANHERO, ni tampoco e Serli-bank !! Demonstra cu enberdad nos tin un parlamento otro y diferente, sino esaki lo keda un STEMPELPARLEMENT!
