Tur cos ta mustra cu lo no bin cambio den e coalicion cu awo ta goberna Boneiro, na nivel ehecutivo. Manera e resultado di eleccion ta mustra, mas bien e coalicion lo keda mescos pero cu cambio den cantidad di diputado. E poder a muda for di MPB pa UPB cu awor a bira e partner mas grandi y probablemente lo ocupa dos funcion di diputado en bes di un, mientras MPB cu tabatin dos lo mester keda contento cu un solo diputado.
E structura nobo na Boneiro
Despues di 10-10-10, Boneiro ta conta cu un Conseho Insular (Eilandsraad) di nuebe miembro. Den e ultimo eleccion MPB a saca cuater asiento, Demokrat a saca tres, UPB a saca dos. Na caminda un asiento di MPB a bira independiente, pa cual e coalicion di seis asiento a bira cinco.
Conseho Insular di Boneiro
E Conseho Insular ta e organo di gobernacion di mas halto na Boneiro. E Conseho Insular ta indica kico tin cu sosode na Boneiro y ta vigila e trabou di Colegio Ehecutivo. E nuebe miembronan di Conseho Insular ta keda eligi door di ciudadanonan di Boneiro durante eleccion. Nan tarea ta forma represtacion di pueblo, stipula e cuadronan y controla e Colegio Ehecutivo.
Colegio Ehecutivo di Boneiro
E Colegio Ehecutivo (Bestuurscollege) di Boneiro ta percura pa gobernacion diario di Boneiro. Na Aruba lo mester compar’e cu nos Conseho di Minister, mescos ta e rol di e diputadonan. Nan ta prepara desicionnan di Conseho Insular y ehecuta nan. Colegio Ehecutivo ta autorisa tambe pa nan mes tuma desicion, manera dunamento di un permit di construccion of cera un contract cu un contratista. E organisacion publico bou di guia di e secretario insular ta duna sosten na Colegio Ehecutivo pa loke ta trata su tareanan.
Boneiro ta conta cu tres diputado, cu ta forma e Colegio Ehecutivo. E tarea di e tres oficinanan ta “Samenleving en Zorg” cu te awor ta ocupa pa Elvis Tjin Asjoe di MPB; “Economische Ontwikkeling, Bedrijfsvoering en Ondersteuning” ocupa pa Hennyson Thielman di MPB y “Ruimte en Ontwikkeling” maneha pa James Kroon di partido UPB.
Resultado di eleccion
Aunke cu ainda Gobierno di Boneiro no a stipula e resultado cu exactitud, te cu awo e resultado ta mustra como lo siguiente:
Ciudadano cu derecho di voto: 16.312
Ciudadano cu a vota: 10.504
Votadonan: 64.4%
Kiesdeler: 1167
MPB: 2038 voto
UPB: 2903 voto
Demokrat: 4004 voto
Union pa pueblo: 268 voto
M21: 979 voto
Lista Suzy Thode: 63 voto
Posibel reparticion di asiento:
Aunke cu e resultado oficial lo sali te mas laat, ta pronostica cu e reparticion di asiento lo por ta Demokrat 3 asiento, UPB 3 asiento, MPB 2 asiento y M21 cu 1 asiento. Pa Demokrat e lo no cambia nada pasobra nan tin tres asiento caba, djis cu nan a crece den voto y a bira e prome partido den historia di Boneiro cu a surpasa cuater mil voto. Pa UPB e ta nifica un crecemento di dos pa tres asiento. Pa MPB e ta nifica perdida di dos asiento den un eleccion, cu ta haci nan e partido perdedo. M21 cu ta un partido cu a lanta despues di un kiebro den MPB a bay cu un asiento. Conocedonan di e materia ta sigura cu salida di Nina den Heyer for di MPB a haci un impacto negativo pa e partido politico cu tabata lidera pa Elvis Tjin Asjoe pero cu algun dia prome cu eleccion a pasa liderazgo pa Hennyson Thielman.
Si UPB keda den gobierno:
Un di e figuranan cu tabata ausente pa hopi aña pero cu a regresa pa yuda e partido ta Ramoncito Booi. El a declara cu, si UPB bay den e siguiente gobierno, cu lo subi avion mesora bay Hulanda pa papia di e acuerdo cu tin di sosten cu mester cambia. Siendo arkitecto di e relacion Hulanda-Boneiro despues di 10-10-10, Ramoncito Booi ta kere cu el a traha e fundeshi pero ora cu a traha e cas no a tene debido cuenta cu e mapa di cas. Aunke e cas t’ey, e no a keda manera e lo a desea. Su vision tabata pa, den e relacion nobo cu Hulanda di 13 aña pasa, cu a acorda cu Boneiro lo ta na e mesun nivel cu e gemeente mas pober di Hulanda. Awo esey no ta asina ainda, aunke den hopi aspecto Boneiro a progresa. Specialmente den infrastructura ta sinti cu tin espacio pa mehoracion. Cu e mensahe aki, si Elvis Tjin Asjoe, cu a sali di UPB, kier sigui traha cu su ex-mentor, lo tin cu bay Hulanda pa exigi mas sosten pa e isla. MPB a bisa den entrevista cu den un siguiente gobierno nan kier e cartera di “Ruimte en Ontwikkeling” cu ta encarga cu tereno y mantencion di e infrastructura di e isla. Pero cu e resultado riba mesa awo y e realidad politico despues di eleccion, e chens ey a bira minimo. Aunke cu den politica, tur cos ta posibel!
Clark Abraham (PDB): Danki!
Partido Demokrátiko Boneriano (PDB) a tende e resultado y a tuma e momento pa gradici e pueblo Boneriano cu a pone nan confiansa den Partido Demokrátiko Boneriano. Clark Abrahams, lider di Partido Demokrátiko Boneriano, a bisa cu ta prome bes den historia cu un partido ta haya cuater mil voto den eleccion di Boneiro. Por mira cu pueblo a scucha e mensahe di e partido. Ta un momento pa nan celebra, pero di otro banda no necesariamente pasobra e mensahe hiba ta cu e pueblo tin dolor y mester di un solucion.
Edison Rijna, Gezaghebber di Boneiro, a informa cu nan a cuminsa mainta trempan y termina den ora di marduga cu e resultado di eleccion pa Conseho Insular di Boneiro. Compara cu eleccion anterior, e ta gradici cu nan a termina mas trempan. Tur cos a bay bon y no tabatin ningun incidente. Mainta tabatin algun cos chikito na un urna y nan a cuminsa un tiki mas laat, pero despues tur cos a cana bon. A haya e resultado relativamente trempan. E manera di conteo a hunga un rol cu a termina mas trempan, pasobra recientemente a cambia e ley di kies wet na Hulanda. E prome anochi ta conta solamente lista pa partido y awe nan ta conta voto di cada persona. Asina ey ta duna awe tardi resultado pa tanto partido como candidato.
Gezaghebber ta desapunta pa e cantidad di persona cu a bay vota. Den eleccion anterior di Eilandsraad tabata 63% y e aña aki ta 64.4%, un di esunnan mas abou den Caribe Hulandes. Ta obvio cu pueblo ta desapunta den politica y gobernacion, un tend
