A haya Gilbert Aron Paesch culpabel di complice den contrabanda di hende. Pero e castigo cu el a haya ta haci cu e no mester bay cera y probablemente lo no perde su trabou na KIA. A acusa e homber di 42 aña di ta complice den contrabanda di un persona. Tabata trata di su sua Venezolano. E mes ta casa cu un persona di e nacionalidad aki.
Na momento cu autoridad a detene su sua, e homber tabatin un celular den su poder cu e mensahenan, relaciona cu e biahe, cu a bin procedente di e telefon di e acusado. E sua mes a bisa cu e acusado aki a yuda, pero e ta nenga di a manda tur e mensahenan ey. El a splica cu e unico cos cu el a haci ta duna nomber di un persona cu por yuda e homber aki yega Aruba y nada mas. Tambe el a conta cu den temporada cu e cos ey a sosode, el a cambia di telefon. Esaki a sosode entre december 2021 y januari 2022. Ademas su casa tambe tabatin acceso na su celular. “Mi sua tabata blo pidi mi yud’e cu tur cos, pero ami no por hacie.”
E acusado aki tin 20 aña trahando na KIA den seccion di Onderhoud Technische Dienst. El a splica den corte cu for di momento cu e cos aki a sosode, a mand’e cas sin salario. E tin un debe na banco cu e no por a paga mas. E interes so a subi cu 20 mil florin mientras cu e debe total awo ta 60 mil florin.
Fiscal den su rekisitorio a trece dilanti cu a intercepta e boto aki dia 11 di januari 2022 y a hay’e cu un celular den cual tabatin diferente mensahe manda y ricibi for di prome cu el a yega e isla. Tin declaracion di doño di e boto, kende ta bisa di a haya instruccion for di e acusado di kico mester haci.
A tene cuenta cu ta prome biaha e ta haya su mes envolvi cu husticia y a pidi 60 ora di trabou pa comunidad of 30 dia cera; 4 siman condicional y dos aña di prueba.
Pa mas lesa TREMPAN.COM.
