Un biaha mas autoridadnan den oranan tempran di mainta, marduga, a tira razzia na diferente punto aki na Aruba, entre otro na cas y negoshi di un empresario local pero tambe na cas di ex Minister di Infrastructura Benny Sevinger. Ademas, a bishita cas na Esmeralda y negoshi na Coral Plaza
Un dia despues cu e ex mandatario a cumpli aña, el a haya e bishita aki, cu no tabata pa trece regalo sino en busca di un celular, perteneciendo na casa di e politico.
A bishita cas na Esmeralda y negoshi na Coral Plaza
A combersa basta largo cu Benny Sevinger, kende a bisa cu tur esaki tin di haber cu e caso Avestruz cu Landsrecherche tin bou investigacion.
Sevinger a cuminsa pa bisa cu no tin problema cu autoridadnan ta bini su cas y e lo no haya straño cu nan bolbe un biaha mas, pasobra ta den aña di eleccion. E ultimo biaha cu nan a confisca material na su cas tabata na october, 2019. No a tende nada mas, te cu awo.
Henter e asunto di Avestruz ta algo cu a cuminsa for di campaña pa eleccion 2017. MEP a haci denuncia y a pone presion pa haci investigacion, inclusive a pone placa den presupuesto pa trece investigadonan di Hulanda. Aki MEP a mustra e poder cu nan tin den Ministerio Publico. Si nan kier persiguibo, nan ta hacie. Esaki no ta nada otro cu persecucion politico. Mi no tin problema pa haci investigacion contra mi. Pero no por ta cu dos aña a pasa y awo ta busca kico pa haya pa persigui e homber. Pues no a haci investigacion prome. Cueste lo que cueste mester haya algo contra e homber aki. E ta mustra con husticia ta traha,” Sevinger a bisa.
Esaki ta bini di un gobierno lidera pa un prome minister, segun Sevinger, kende ta duna su tata contracto directamente. Ey OM no a cuminsa ni un investigacion superficial pa mira si tin algo. Pero e guy di Rancho si ta bay persigui. Pero nada contra e prome minister cu ta duna su tata muyones. Ta sinti cu husticia no ta conta pa tur hende, pa cierto hendenan so. “Esey ta loke mi ta sinti,” e politico, bisti den su pijama ainda, a bisa.
El a bisa tambe cu e no ta compronde di con nan kier bin cuestiona con el a traha su cas. El a mustra cu e tegelnan el a cumpra pa 1 dollar na Merca. Cuatro biaha el a cera hipotheek pa e cas y di un suma di 600 mil florin. “Mi a cuminsa traha riba e cas prome cu mi a bira parlamentario, y ainda mi ta traha riba e cas. Mi mes ta traha riba e cas, den weekend pegando bloki, pleister y verf. Mi mes ta haci tur cos. Mi mes a traha mayoria di mi muebles. Awo nan kier averigua con mi a paga mi tegels, bentana y portanan. Pero tur cos ta bay cay bek den politica.”
Apesar cu e ta trata di algo politico, e ta sinti cu poco poco e asunto lo aclarea. No tin nada di bendemento di tereno di gobierno. “Pero ami no tin nada di sconde. Mi no tin placa, arma ni droga. Mi tin dos cacho y famia. Mi a traha duro pa loke mi tin. Pa un grupo elite, nada ta conta pa nan.”
E otro cas unda a bay ta di un amigo di Benny Sevinger, cu e conoce for di tempo di Watty Vos y nan ta practica deporte hunto. Ta tristo cu door di politica, ta perhudica un amistad.
