Ya pa di tres dia consecutivo, docente y alumnonan di Colegio San Nicolas a tene un tipo di protesta leve. Den un rueda di prensa durante pauze, docente y alumnonan a reuni, pa asina haci un declaracion, unda cu nan ta pidi pa e minister di enseñansa, Rudy Lampe y DPS, duna nan oido.
E protesta aki ta a base di declaracionnan haci di e minister, unda cu e ta bisa cu ta e docentenan ta fix rooster, nan ta fix nan oranan pa asina nan haya mas placa, cual segun e docentenan, ta totalmente incorecto. No ta e docentenan ta traha rooster. Tur esaki ta bin di inspectie y mas halto.
Tambe tin un rapport cu e mandatario a divulga, cu nomber di docentenan poni, hendenan cu ta cumpli cu nan tareanan. E mandatario a splica cu e resultado ey tabata basa riba un “moment opname”.
Tambe a sosode cu e Minister a trece esaki den contexto robes y a mustra cu e hendenan den e rapport a comete acto fraudulento, cual ta incorecto.
Docentenan ta pidi aclaracion di tur stakeholder, minister, Inspectie, Management Team (MT), y a haya respuesta solamente di MT y Inspectie.
Minister y DPS no a duna cara pa splica dicon cierto decisionnan a sali afo, cual no ta inetico. Por bisa cu un rapport ta publico pa tur hende mira. Pero ta duda cu ta etico pa saca nomber den publicidad. Esey por tin consecuencianan cu ne.
Fuera di esey e docentenan ta sinti cu ta acusa nan di algo eroneo. No a busca dicon e cifranan no ta den sistema. Cada docente tin nan motibonan dicon. Asina por ehempel por tabatin problema cu internet of cu diferente rooster, ta berdad, segun un di e docentenan. Pero no por culpa e docentenan di loke a pasa. Si tin 7 filter, e erornan ey ta na e 7 filternan, no e docentenan.
E docentenan ta wak mas di 100 mucha pa dia. Cu ki cara ta para dilanti di klas manera nada no pasa, ta pregunta cu un di e docentenan a lansa.
Tur tin emocion y ta merece di ta trata manera humano. Nan ta bringando pa nan derecho humano y balora den comunidad y esey no ta mustra di banda di Minister y DPS.
Lesnan ta sigui
Riba nan propio consenshi les ta sigui awe. P’esey den pauze nan a bin hunto pa duna un declaracion y mustra cu CSN (Colegio San Nicolas) Matters.
Di parti di e studiantenan, nan a cansa di abuso di hendenan mas ariba, nan ta cansa di tur acusacion contra di e maestronan cu ta traha duro.
“Ken ta abo pa acusa nan”, un di e alumnonan a cuestiona durante e rueda di prensa. E alumno a papia pa tur cu ta cansa y nan ta keda bringa tambe.
Ta spera cu esaki por yega na oido di Minister y DPS pa nan atende cu nan manera cu nan merece.
