Abuso di mucha sigur ta un tema hopi delicado y e simpel hecho cu mester haci denuncia, tin biaha ta yena mayornan di e victima cu sea miedo of berguensa pa e haci esaki. Na palabra Erick Barry, kende ta coordinador di Jeugd en Zedenpolitie.
E ta splica cu asina pasa un caso asina, mayornan mester bin na un di e wardanan di polis. Depende e ora, ta tuma contacto cu JZP, unda cu ta manda un hende di biaha eynan pa tuma declaracion.
Polisnan sa di e actonan chikito y ta puntra breve si e victima a baña etc, y ta wanta nan te ora JZP bin. E mucha no mester baña etc. pa haya miho prueba.
Ora cuminsa papia cu nan, tuma tur declaracion, e ora ta inclui Slachtofferhulp. Nan t’ey pa yuda e mayornan, e victima tambe pa gui’e. Ta algo hopi importante segun Barry. E departamento ta traha hopi bon y estrecho cu Slachtofferhulp.
Ora ta trata di un caso di un siman of un aña bieu, tin cu purba di corda kico tur por a pasa y e luga unda el a pasa, pa wak si cosnan por cuadra di kico a sosode, cual ta mas dificil.
E pruebanan ta hopi mas dificil pa haya, etc. Door di spanto y miedo, esey ta haci mas dificil e casonan ey. Casonan comun cu a sosode na e momento ey, ta casi vaag. Ta haya mas tanto casonan cu a pasa dos of tres dia prome, un siman, of un aña prome. Ta un trabao hopi challenging. E recherchenan ta haci un trabao tremendo.
Barry a conta cu e victimanan y nan mayor por conta cu na balie ta atende nan un team di recherche cu conocemento di casonan asina. Y ta busca e persona mas adecuado pa papia cu e victima y su mayornan.
Ora haci denuncia, loke ta haci ta cuminsa cu un investigacion. Ta tuma declaracion di testigonan, pa mira ken tur e victima por a conta, yama “stille disclosures”, pa mira kico a pasa. Ora abusa un persona, ningun hende ta testigo pa wak esey. Mester wak e sentimentonan di e persona. Ta duna e declaracion, ta manda tur cos pa Officier, kende ta lesa e stukken y despues ta duna ordo, si tin suficiente base pa detencion. Recherchenan ta traha pa tin un bon dossier hinca den otro pa logra haya e aprobacion di fiscal pa detene e sospechoso. No mester lubida cu e ta exigi hopi investigacion pa motibo ta trata aki di sentimentonan, ya cu casi nunca tin testigo mes di loke a pasa. E testigonan ta e prome hendenan cu e victima a conta loke cu a pasa y si esey ta cuadra cu loke e victima mes a declara na Recherche.
Tambe ta haci investigacion cerca esnan cerca di e victima, si el a cambia di actitud of ta haci cosnan straño.
Como cu e ta un situacion hopi dificil, mester busca un ambiente unda tanto e victima como su mayornan ta sinti nan mes comodo pa papia. Pa e motibo aki Bureau Sostenemi a cuminsa cu un seccion cu ta brinda e tipo di ayudo aki, manera un intermediacion pa e victima yega den forma trankil y comodo pa papia cerca JZP. Bureau Sostenemi tin profesionalnan pa guia victimanan.
JZP di Polis ta habri di 8’or di mainta pa 4’or di atardi, di dialuna pa diabierna. Nan tin warda tambe. (Piket). Si suceso a pasa durante fin di siman of despues di oranan di oficina, piket lo por bin pa asina tende di e persona.
