Actualmente mundo tur dia ta haya casonan acerca di COVID-19. Nos mester cuida nos mes. Y si nos ta vulnerabel, sigui cosehonan di Departamento di Salud Publico.
Transmisionnan local ta sosodiendo y bo ta haya casonan importa ta sosodiendo, segun Eugene Maduro di e Departamento di Epidemiologia y investigacion.
Ta wak cu di e tanto casonan cu tin registra, esunnan cu ta den estado critico, hopi biaha ta personanan caba cu ta sufri di un malesa. Por ehempel nan por tin diabetes, nan por tin presion halto, nan por ta pashentnan di cancer. Of por ta ta hendenan cu nan sistema inmunologico ta comprimi. Por pensa cu esaki ta e gruponan vulnerabel pa tur tipo di malesa infeccioso of infeccion viral.
Esnan cu ta mas debil y nan sistema ta hopi abao lamentablemente no ta wanta e virus aki. Pesey mes tuma precaucion. E ta necesario. Hopi di e mortonan cu ta registra ta hendenan riba 70 aña y ta hendenan cu tin un condicion pre-existente.
Esaki ta un grupo hopi vulnerabel pa contrae e coronavirus y tambe cu por tin consecuencia fatal. Hopi biaha un porcentahe halto, 9 di cada 10 hende cu wordo infecta cu coronavirus, ta recupera 100%. Por bisa cu e 1% ta net esunnan cu nan ta, door di complicacionnan ricibi door di e virus, nan ta bin ta fayece.
Scucha y tuma e conseho di Departamento di Salud Publico na serio. Sigui e pasonan y e consehonan. E ta bon p’abo mes. Medidanan di precaucion ta laba man constantemente. Esey ta un di e medidanan cu Organisacion Mundial di Salud ta stress hopi riba dje. Laba man frecuentemente cu awa y habon. Si bo no por, e ora bo ta haci uzo di handsanitizer cu ta contene 60% di alcohol. Tin cu aplica e etiketa di niester, den e sentido cu ora niester, no niester den bo man, sino niester den bo elleboog.
Si bo ta malo, keda cas, e ora yama bo dunado di cuido, den e caso aki bo dokter di cas. Telefonicamente e lo haci e preguntanan necesario.
Keda informa bo mes di e desaroyo y keda al tanto di kico ta loke Departamento di Salud Publico ta considera como un caso sospechoso.
Un caso sospechoso di Coronavirus ta un hende cu a desaroya sintomanan respiratorio cu ta inclui keintura, tosamento y dificultad pa hala rosea y e persona aki a bin for di un area, un pais, un teritorio cu tin casonan di transmision local. Es decir, si b’a bin for di Italia, si bo a bin for di China, si b’a bin for di Iran, for di Hapon, for di un di e luganan cu ta wak cu por tin transmision local na gran escala ta sosodiendo, bo bin bek y bo desaroya sintomanan entre 2 cu 14 dia, yama bo dunado di cuido, den e caso aki bo dokter di cas y telefonicamente e lo haci e preguntanan necesario. E ora bo por wordo considera como un caso sospechoso pa loke ta coronavirus.
