CEDE Aruba a lansa proyecto ‘Ban Caya’ aña pasa cu meta importante pa sostene iniciativanan di bario, colaborando hunto cu comunidad pa promove barionan mas sano na Aruba.Meta di Ban Caya ta pa reactiva e barionan pa trece nan hunto, pa organisa actividadnan di ban caya, pasa un dia cu nan sernan keri, conoce nan bario y tur organisacion cu ta traha den nan bario. E idea a nace door cu IBiSA ta conoci pa organisa ciclovia y e tabatin un impacto positivo riba e comunidad. ‘Ban Caya’ a keda presenta caba na algun districto na unda a presenta esaki cada den su forma y su categoria.
Elsa Krozendijk di CEDE Aruba ta splica cu esaki a pone cu el a bira exitoso y di otro banda kier sigui uni comunidadnan hunto pa sa kico ta locual nan barionan tin pa ofrece. Esey ta pone cu a scoge pa sigui cu Ban Caya e aña aki y scoge cuater diferente districto unda lo presenta e proyecto bunita aki. E ta un oportunidad perfecto pa comunidad bini hunto y conoce kico nan bario tin pa ofrece, kende nan tur t’ey den nan bario y cua ta e centronan di bario cu lo t’ey semper pa brinda informacion, guia y tambe programanan di actividad.
E prome Ban Caya pa 2024 lo ta 27 di april riba Dia Di Rey cu ta dia liber y lo bay haci San Nicolas oraño. Tur cos lo cuminsa 4’or di atardi te cu 8’or di anochi riba e caya dilanti di Joe Laveist Sport Park, rotonde di Pastoor Hendrikstraat te cu St. Paulus School.
“Nos ta kere cu sigur e ambiente di san nicolas lo mester t’ey,” segun Krozendijk.
Esey a pone tambe cu tanto Centro di Bario Lago Heights y Centro di Bario Brazil ta uni hunto pa asina presenta e prome Ban Caya 2024. Lo tin diferente actividad y ta gradici iBisa, cual ta e partner den e evento aki. No ta facil pa pone clubnan deportivo riba un dia liber hunto ni tampoco fundacionnan, y tambe na coleganan na CEDE cu ta haci esaki posibel trahando hunto como team pa haci esaki posibel specialmente pa San Nicolas.
Lo conta cu un total di 43 diferente fundacion, organisacion y instancia cu lo bini hunto pa brinda informacion riba kico tur tin pa ofrece. Lo tin show tambe na unda cu San Nicolas completo lo comparti nan talento riba escenario. Pa prome biaha lo tin un Kids Markt tambe den Ban Caya hunto cu Cruz Cora unda hobennan lo bende nan articulo estilo Pop Op Store. Por sigui e plataformanan di CEDE Aruba online pa asina keda bon informa riba kico tur lo ta tumando luga p’e prome Ban Caya di 2024.
CEDE ARUBA
Cede Aruba ta un organisacion di desaroyo, ta financia proyectonan di comunidad cu fondo, ta yuda tambe den capacity building, networking, treciendo organisacionnan hunto. Tambe nan ta ehecuta proyectonan activo den comunidad.
