Despues di tur e informacionnan cu a cuminsa circula relaciona cu e Helicopter cu Gobierno ta lease pa Cuerpo Policial di Aruba (KPA), Korpschef interino Irma Gordon, den nomber di Altocomisario Ramon Arnhem, a dicidi di saca un ordo pa no haci uzo di e helicopter mas te proximo aviso.
Net despues di a tuma e decision aki, Minister di Husticia Rocco Tjon a bay den un conferencia di prensa unda cu a splica cu no tin nada malo tras di e contracto y cu e medida tuma door di KPA relaciona cu e helicopter, tabata simplemente algo preventivo. Pero cu lo cambia esaki.
Esaki tabata e prome pregunta cu Minister Tjon a haya for di prensa. “Mi tambe a wordo informa di esey awe mainta,” el a cuminsa pa bisa. Sinembargo a bisa cu esey tabata un accion preventivo, ‘mirando cu e no tabata dispone di e informacion aki ainda. Aworaki e mes ta di biahe. Un otro korpsmededeling lo sali mas laat y ta hala e prome aden, mirando e informacion cu tin y e briefing cu mi a duna Korpschef net prome cu el a biaha.”
Tjon ta bisa cu mirando tur loke cu ta pasando awo, toch e lo no a haci diferente, pasobra e ta na fabor di uzo di helicopter. “E balor agrega di un helicopter ta wordo demostra constantemente, ora di hallazgo pero den rescatenan.”
COMISION
E contracto aki ta finalisa na april, 2024. Y e lo bay pasa den un otro procedura na momento di yega na un contracto nobo.
Minister Tjon a splica cu ta bay instala un comision cu ta bay evalua kico ta e pasonan cu kier bay tuma pa e siguiente añanan. Esaki den cuadro di avancenan tecnologico y “mirando e hecho cu nos mes kier bay explora otro opcionnan. Pero mi kier enfatisa cu mi ta apoya uzo di helicopter, el a demostra di tin su balor agrega.”
