Desde awe diadomingo mainta tabatin un reto tecnico grandi na e United States Customs Border Protection (US CBP) Aruba. Parce cu nan tabatin problema cu conexion via nan sistema di internet. Tur cos ta mustra cu for di Aruba e sistema no por a comunica cu Merca, cu consecuencia cu tur buelo a sali “post clear”.
Esey ta nifica cu e vuelonan di awe diadomingo no tabata “pre-cleared”, pues ora nan a yga Merca mester a para toch den fila na Migracion y despues na Duana. Un ke otro tin di haber cu tabatin un fayo den e sistema di comunicacion entre Aruba y Merca. Como cu no por a verifica ken tur ta riba e vuelonan, no por a “pre-clear” e vuelonan.
Parce cu lo mester tabatin un problema serio di comunicacion entre Aruba cu Merca. Kico a bay robes, ainda no ta conoci, pero un rato pasa a confirma cu a regla e problema y cu mañan vuelonan lo por sali “pre cleared” atrobe.
Filanan largo
Pero prome cu esey, e fayo aki a pone cu a cera e facilidad di US CBP na Aeropuerto y no tabata laga pasaheronan ni drenta paden. A forma filanan largo cu tabata pasa den henter nos aeropuerto y bay te pafo dilanti aeropuerto, den pleno solo. Pasaheronan tabata keha hopi riba red social pasobra e ta un situacion inusual cu e fila no tabata move mes. Hopi lihe a haya sa cu e problema tabata na Migracion Mericano.
Como cu e fila pa drenta US CBP tabata bay te pafo, a pone cu e demas autoridadnan local tampoco no por a sigui procesa mas pasahero pa no aporta na formacion di mas fila ainda. Tabata wanta e pasaheronan pafo di e terminal pasobra si nan pasa Migracion Rubiano mes, toch nan no por sigui pa esun Mericano debi cu e facilidad tabata cera pa publico, pendiente pa nan resolve e fayo. Tur e tempo personal di operacion di Aruba Airport Authority mester a atende cu pasaheronan disgusta y cansa, wardando oranan largo pa por bandona nos isla.
Buelonan “post clear”
Na final autoridad Mericano a dicidi, pa evita mas tardansa y cu “delay” riba buelonan existente, a opta pa laga e pasaheronan pasa y subi avion sin control. A laga autoridad sa na Merca pa awe nan mes handle e pasaheronan na nan yegada na sea Miami, New York, Boston, Philadelphia, Fort Lauderdale, Charlotte y Baltimore.
