Diabierna awor e programa mas anticipa NA DREMPEL DI FIN DI AÑA ta cuminsa, a traves di e radio emisora Magic 96.5 FM y presenta pa Erin Croes. “Ta increibel e amor y anticipacion cu ta biba memey den comunidad, di tanto grandi, hoben y chikito pa e programa mas anticipa di e temporada di fin di aña”, asina Erin Croes a sigura.
E programa a start desde aña 1988 caba y ta alegra hogarnan ya pa 33 aña consecutivo. Kico ta e secreto of e formula, no por bisa, pero e dedicacion y consistencia ta loke a haci e formula aki esun ganado. Creado y presentado di “Na drempel di fin di aña”, esta Erin Croes, ta sumamente satisfecho cu e recepcion y anticipacion di semper.
“Ya bo tin un draaiboek pa traha cu ne, cual ta hacie mas facil” segun Erin Croes a comenta, pero definitivamente tur aña tin algo nobo pa presenta y esey ta e exito di e show. “Mi por anticipa hopi premio bunita y sorpresa”, Erin Croes a adelanta.
Diabierna awor dia 15 di october pa 6:00 pm ta e fecha y ora inicial e aña aki a traves di e emisora MAGIC 96.5 FM. Normalmente ta habri cu fiesta grandi pero debi na e circunstancianan actual, a scoge pa motiva publico y famianan pa forma nan propio ambiente den nan cura di cas.
“Traha y forma bo propio ambiente y manda nos potret y bo ta participa pa gana premionan cash”, di acuerdo cu Erin Croes. “Nos lo transmiti en bibo riba radio Magic FM, riba Facebook page “Na Drempel di fin di aña”, riba website y riba bo app preferi.
“Nos ta sumamente gradici pa tur e apoyo di semper y e optimismo pa e show aki cual ta forma parti di e sentimento di berdadero alegria y amor cu e temporada ta trece cu ne”, asina Erin Croes a termina bisando.
