AVP na MEP: Sin atende universidad Boso famia ta rico cu placa di pueblo!

1946

Benny Sevinger miembro di fraccion di AVP diamars ultimo a reacciona riba declaracionnan haci pa Prome Minister Evelyn Wever Croes, riba e crisis cu su gobierno ta pasando aden y e ola di corupcion cu Minister Marisol Lopez Tromp a divulga di su gobierno.

Seaora Sevinger a enfatisa cu ningun momento ningun miembro di partido AVP, lo a sugeri pa forma un gobierno nobo cu partido MEP pero ta un expresion cu a Sali for di ex lider di partido MEP, Nelson Oduber.

“Na momento cu Prome Minister ta bay prensa y insinua cu lo tin un probabilidad pa un gobierno AVP-OLA, sabiendo cu ningun miembro di AVP a haci un declaracion semehante, e ta mustra di con su gobierno ta den e situacion cu e ta na e momentonan aki.

Ta bon pa mustra cu Evelyn ta papia manera cu nada ta pasando den su gobierno pero e tin henter un bulula den su gobierno cu su partner partido OLA y un di su Ministernan cu tin acusacion serio di corupcion den Gabinete Wever Croes.

Ya caba diabierna Evelyn no por a wanta e presion di e reunion, caminda Minister Marisol a trece pruebanan serio di corupcion den DIP, na Serlimar y a mustra riba un pregunta di un miembro di fraccion di MEP, cu tin otro Ministernan tambe envolvi.

Na momento cu Prome Minister kier papia di integridad, cu su persona ta contra corupcion, e tin cu splica pueblo di con el a duna ordo pa bay over na suspende e reunio di diabierna ultimo y ki tabata e motibo.

Mientras cu Minister ta dunando cuenta na su Hefe cu ta Parlamento di Aruba, Prome Minister ta inventa un excuus pa suspende e reunion y evita loke Minister Marisol lo a bin bisa cu e lo trece mas cos dilanti den ‘tweede ronde.’

Awor pa motibo cu su consehero Nel Oduber a haci un declaracion cu e dos partidonan mas grandi lo tin cu bay traha hunto, Evelyn ta bay prensa y yama AVP un universidad di corupcion y aki ta bon mi mustra su persona kico ta corupcion.

Evelyn lo bay den historia como e prome dama cu ta bira Prome Minister di nos pais pero tambe e lo keda conoci como e Prome Minister cu mas famia el a duna trabou, cu mas famia di dje a bira rico cu placa di pueblo y ta bon pa menciona e lista cuminsando cu Papa Hendrik.

Evelyn su esposo Kenneth, su yiu homber Kevin y su pareha, Rudy Croes, Maikito Croes, Glenbert Croes, Joally Croes, Sandra Croes, Endy Croes, Junior Croes, Giendaline Croes, Gisette Croes cu su pareha, Grace Koolman, Arleen Croes,  Mr Dijkhoff suegro di yiu cu a haya kiosko, pues henter un kliek  di famia y awor kier bin papia di universidad di corupcion.

No solamente esey pero Prome Minister Evelyn Wever Croes, heredero di e oficina di abogado di Papa, ta hunga wega di sabi, ora cu el a dirigi un carta na Directornan di WEB, Elmar, RdA y Utilities, pa bisa e directornan aki pa haci mas uso di otro oficinanan di abogado pa atende nan asuntonan.

E carta aki ta fecha dia 30 di oktober di 2019 pero tur esaki mientras cu ya den un carta fecha 20 di december 2018, e ta informa Utilities Aruba NV cu e abogado Ruiz di oficna Croes, Wever, Ruiz lo ta representa su persona como ‘aandeelhouder’ den e compania estatal aki y cu e tin autoridad pa yama reunion na su nomber.