A tuma casi dos lunadespues di eleccion y apenas diabierna ultimo a huramenta e Gabinete Wever-Croes. Remarcabel ta cu partidonan cu a busca y haya otro prome cu eleccion pa goberna hunto y laga AVP afo, a tuma tanto tempo pa forma cu otro. Nos partido desde inicio di e proceso aki a indica cu nos ta respeta e derecho di e partidonan aki pa forma hunto y no a stroba den ningun forma, asina Robert Candelaria di fraccion di AVP a duna di conoce.
Ministernan a haci apelacion na mas cu un ocasion pa e Gobierno nobo forma, pa asina por traspasa e trabounan na e gabinete nobo. Mi ta felicita e partidonan cu a logra forma Gobierno y ta spera cu e Gobierno aki lo traha na bienestar di cada ciudadano di Aruba, sin haci distincion di hende of color politico.
E Gobierno aki a bisa cu basicamente nan coalicion lo ta basa riba 3 pilar, esta Deugdelijkheid van bestuur (bon gobernacion), Deugdelijkheid van financieel bestuur (bon maneho financiero di Gobierno) y cu e ser humano lo ta central. E principionan aki ta fundamentalmente di partidonan Cristian Democrata cu ta e principionan di Partido AVP. Nos ta contento cu e Gobierno aki ta pensa den e liñanan aki, pasobra eseynan ta principionan cu nos partido semper a para pa nan y ta principionan necesario pa goberna un pais corectamente. Ta bon pa realisa si cu e Gobierno aki a pone un exigencia halto pa nan mes. No ta facil pa cumpli cu e promesanan aki y bo mester tin bon intencion pa por cumpli cu e puntonan aki. Na Hulandes nan ta bisa cu nan a “leg” e “lat hoog” pa nan mes.
Laga nos analisa algun cos cu e miembronan di coalicion a bisa y haci recientemente, hasta prome cu nan a forma y tene esaki den e luz di bon gobernacion. Nos lo analisa pa mira si nan ta duna indicacion cu realmente nan kier y nan por alcansa e standard cu nan mes a pone.
Un principio di bon gobernacion ta confianza. Pueblo mester por confia palabra di su gobernantenan cu nan lo haci loke nan a bisa cu nan lo haci, y cu loke nan haci, nan lo ta transparente pa bisa tambe loke nan a haci. Na mas cu un ocasion lidernan di e partidonan di coalicion a bisa enfaticamente cu ora nan drenta Gobierno lo tin 7 Minister so y ni un mas. No tabatin hende a pone presion riba nan pa bisa esaki, pero el a wordo bisa cu lo bay tin 7 Minister so y esaki ta un pilar di nan programa di gobernacion.
Di e forma ey no lo baha tur gasto di Gobierno y drecha finanzas publico di pais Aruba. Awor nos ta mira cu esaki a bira un topico cu nan no ta toca mas. Pero si un di e pilarnan principal di bo promesa pa gobernacion ya a wordo rechasa, kico ta e señal cu bo ta mustrando cu pueblo cu por spera di bo. Kico ta e balor di bo palabra y bo promesa? Awor nan a drenta Gobierno cu 8 Minister y un persona lo fungi como semi Secretario di Estado. Basicamente e cantidad di Minister a keda 9, a pesar di e promesa di 7 Minister y niun mas. E diferencia ta cu a cambia nomber di e funcion Minister pa acomoda e 9 funcionarionan.
Partido RED a indica cu niun hende di e partido lo bira Minister, pasobra nan lo bin cu vakministers so. E prome y unico Minister cu e partido ta bin cune den e coalicion aki ta un miembro di e partido cu repentinamente mester a tuma retiro di e partido pa por bira Minister tog. Esaki ta bay contra loke e partido a bisa cu nan ta para pe. Aunke e no ta algo fundamental di peso pa gobernacion cu un partido ta pone un vakminister of un Minister di su partido, pero den e caso aki e ta mustra cu e partido ta bisa un cos y haci otro cos. Esaki ta bay contra tur principio di integridad y pues un biaha mas contra e principio di bon gobernacion.
Manera e Prome Ministro a indica, tabatin hopi “fake news” e ultimo dianan. Nos tambe naturalmente ta completamente contra fake news. Nos no ta den e posicion pa bisa cu informacion regardando screening ta basa riba realidad y kico ta noticia falso. Loke si nos kier pidi transparencia riba dje ta cu e Gobierno nobo realmente mantene e principionan di bon gobernacion riba e punto aki di integridad personal tambe.
Tabatin basta motibo di speculacion pakico cierto integrante di e Gobierno nobo lo no a pasa e screening. Pueblo mester tin confianza den e integridad di su gobernantenan y confianza ta algo cu bo tin cu traha duro pa haya y bo ta perde facilmente. Nos apelacion na e Gobierno, den nomber di pais ta, pa no defrauda e pueblo su confianza. Nos lo tey pa wak hunto cu pueblo y pa pueblo pa esaki no tuma luga sin consecuencia.
Nos a priminti un oposicion fuerte y critico, pero cu respet pa pueblo y tur hende. E prome observacion cu nos por haci ta cu e Gobierno a haci algun cos cu ta bay contra loke nan ta papia y asina violando principio basico di bon gobernacion. Nan ta bisa A y haci B, papia blanco y haci shinishi. Bon gobernacion ta mas cu papia loke ta corecto. E ta haci loke ta corecto, ora e spotlight ta riba bo y ora bo ta den sombra.
E coalicion nobo a presenta su mes como un partido cu ta wordo yama MEP-RED-POR. Esey ta nifica cu Aruba awor tin 2 partido den parlamento cu ta AVP y MEPREDPOR. Si e Gobierno aki continua den e direccion cu nos por mira e dianan aki di ta papia un cos y haci otro, e unico y miho alternativa ta e partido AVP. Nos tabata y nos lo sigui tey pa sirbi nos digno pueblo, den cualkier rol cu pueblo ta desea esey.
