Dialuna pa 7:55am a bati alarma pa un auto na candela na Balashi, riba e caminda etre e rotonde di ex-Drive Inn Theater y WEB. Polis a yega topa cu dos dama hopi spanta pa locual nan a experencia. E auto marca KIA modelo Rio cu number A-10285 tabata completamente bou huma.
Parce cu e chauffeur tabata riba caminda ora diripiente e auto a cuminsa saca hopi huma. El a dicidi di para e auto den banda pa check kico lo por tabata pasando. Chauffeur di un otro auto pasando a nota e situacion, a baha saca un fire extinguisher y cuminsa combati e candela.
A informa Brandweer cu entretanto a saca un unidad pa e sitio tambe. Na nan yegada a sigui combati e candela di auto. Mester a desarma tur conexion di coriente den motor di e auto pa evita oportunidad pa mas candela.
E unidad di Polis cu a yega na e sitio a percura pa tene e dos damanan sigur riba un distancia y a desvia trafico pa Bomberonan por a traha den tur trankilidad. E patruya mes a baha e dos señoranan na un cas den vecindario y a informa e chauffeur pa e regla pa un takelwagen move e auto di eynan y hibe un otro sitio mas sigur.
Kico a causa e candela no ta conoci, pero hecho ta cu e candela a expande lihe y a kima practicamente henter e auto. Tanto e chauffeur como e pasahero no a haya mucho chens pa check kico tabata pasando pasobra prome cu nan kier a realisa, e auto tabata completamente bou huma caba.
