AHATA a eligi Hunta di Directiva pa aña 2019

Aruba Hotel & Tourism Association a organisa nan asamblea general anual cu e meta di eligi un hunta nobo pa otro aña.

CEO di AHATA, Tisa LaSorte a presenta un ‘update’ di e actividadnan di e asociacion den aña 2018, incluyendo esfuersonan di abogacia, proyectonan comunitario, y workshop educativo. Tambe a presenta y aproba e presupuesto pa aña 2019 y cambionan den e reglamento.

Al final a miembronan presente na e asamblea a eligi e hunta pa 2019. E hunta nobo cu ta sinta na Januari 2019, lo ta: Joe Najjar di La Cabana Beach Resort & Casino como Presidente, Paul Gielen di Renaissance & Casino come 1e Vice Presidente, Juan Carlos Blanco di Riu Palace Antillas como 2do Vice Presidente, Ewald Biemans di Bucuti & Tara Beach Resort como Tesorero, Warren Stanley di De Palm Tours como Secretario, y Directornan: Javier Wolter di Caribbean Mercantile Bank, Samuel Johnson di Barceló Aruba, Richard Roy di Tropicana Aruba Resort & Casino, Edgar Roelofs di Manchebo Beach Resort & Spa, Steven Redkoles di The Ritz Carlton Aruba, Marin Bijl di Divi Tamarijn Aruba All Inclusive Beach Resort, Carlos Cabrera di Hyatt Regency Aruba Resort, Spa & Casino, Karen Chastain di Aruba Marriott Resort & Stellaris Casino.

Tisa LaSorte a gradici e hunta di 2018 pa facilita su transicion den e posicion di CEO y a gradici Divi Resorts pa ta anfitrion di e reunion y e recepcion.

Carlos Cabrera, Gerente General y Vice Presidente di region di Hyatt Regency Resort & Casino, ta haya cu e asamblea general a bay hopi bon. E gerente general ta e Presidente di AHATA na 2018 y a expresa  cu Tisa LaSorte ta un adkisicion fenomenal pa e asociacion cu desde su prome dia den e posicion na AHATA ta haciendo un bon trabou. Segun Cabrera cu por a ripara esaki den e forma con e tabata presenta informacion durante e asamblea general.

“Tin hopi ta sosodiendo na Aruba. AHATA ta un di e motornan economico di mas grandi di nos isla y nos ta interesa pa mantene exito den e sector, pa enfoca riba e bishitantenan, y percura cu e pais ta sigui bay dilanti. Ta un prioridad pa percura cu ta trece mas turista cu ta desea di gasta mas riba e isla, pa asina Aruba por beneficia di esaki. E asociacion di hotel turismo tin e responsabilidad di proteha e interes, pasobra Aruba ta depende di dje”, asina e Presidente saliente, Carlos Cabrera, a finalisa bisando.