Apenas algun ora di aña y riba prome di January 2018 a sosode un atraco basta serio riba un pareha turista canando den e area di Emmastraat cu Professor Lorentzstraat.Esaki a pasa net prome cu 11or di mainta. Un pareha turista Aleman cu ta di bishita na Aruba a wordo atraca canando bayendo supermercado den Emmastraat. E homber color bruin y bisti cu camisa y carson preto a atracanan. E homber tabata arma cu cuchio y durante e atraco brutal a corta ambos persona. E cortanan tabata na man y otro partinan di pia. A lucha cu e turistanan y nan a cay herida nan rudia tambe. A purba core tras di e atracador cu a bay direccion pabou den mesun caya.
E gritonan di e victimanan a pone bisiñanan sali mesora y topa cu e situacion tristo pafo di nan cas. A saca un man mesora y bati alarma. Polis a yega y pidi presencia di dos ambulance. E bisiñanan mes a cuminsa atende ambos victima cu nan herida pendiente ambulance. Atraco Team a wordo avisa y Polis a cuminsa cu un buskeda rond pa e atracador den area di Socotoro y Madiki. E turistanan sa bin Aruba caba y ta keda na un Boutique Hotel di un dokter den cercania. Segun e pareha herida, nan kier a bay cumpra cos na Chines cu ta habri e momento ey. Nan a perde algun 100 dollar y tambe paspoort cu cellular. Esey ta loke e atracador a logra bay cune. E bisiña nan cu a mira a logra conta Polis tur cos. Tambe e personal di Atraco Team a keda di bay Hospital pa asina mira ambos victima y papia cu nan.
