Despues di a permanece pa mas cu 4 siman bou di supervision y preparacion intensivo den un campo di entrenamento na Medellin Colombia, bou guia di e ex-entrenador nacional di Aruba, Sr. Adolfo Gallego, e atletanan elite di pesas, Jennifer Piter y Joel Kuiperi ta cla pa un otro reto esta competi den e Campeonato Pan Americano di weightlifting 2017 cu lo tuma lugar na Miami, Florida.
E campeonato aki lo ta e dianan 20 pa 27 di juli, unda Jennifer y Joel lo competi contra e miho hisadonan di peso den e continente America. Remarcabel ta cu e competencia na Miami ta un clasificatorio pa e Weganan Panamericano 2019 di Lima, Peru. Durante di e competencia aki e atletanan di Aruba por acumula punto y asina clasifica den e sistema di puntuacion riba e ranking final, mas halto e ranking mas grandi e posiblidad di clasifica. E clasificacion lo ta parti den dos competencia den nos region Pan-Americano y esaki lo ta e prome. E atleta masculino Joel P Kuiperi lo competi den e categoria – 105 KG mientras e atleta femenino Jennifer Piter lo competi den e categoria – 63 KG.
Hunto cu e atletanan lo biaha coach Patrick CA Vrolijk. Mester bisa cu e dos atletanan elite den e deporte di weightlifting tin record Arubano riba nan nomber y den pasado a n varios competencianan internacional den nos region. Mas cu claro cu exito unda nan a logra trece medaya pa Aruba.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe di e delegacion di pesas pa e campeonato Pan Americano di Weightlifting na Miami, Florida. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
