“Den e lunanan cu a pasa tabatin hopi insulto, instigacion, mal nomber a ser duna door di tur politico di nos pais den direccion di Hulanda. Nan a lubida cu ta danki na Hulanda Aruba den un temporada asina dificil a saca un man pa yuda nos,” esaki e ciudadano Atan Lee di Movimiento Futuro ta bisa den un declaracion manda pa prensa.
Si Aruba no ta pertenece na Hulanda y tin nacionalidad Hulandes ta con nos ta para awe? Baha pisa ariba comercio, mencionando cu danki na Gobierno di Aruba cu awe comercio tin loonsubsidie pa paga su empleadonan y tambe na esnan cu no tin trabou ta ricibi Fase tur luna. Aki si nan no ta menciona di unda e placa a bin cu nan por paga esakinan. Hulanda a saca su man yuda nos pais, desde principio cu e crisis a cuminsa, ta Hulanda a bin cu e proposicion pa bin cu loonsubisidie pa evita cu hopi negoshi lo bay failliet, esaki no ta un idea di e Gobierno di Aruba.
Pero, e ta sigui bisa, asina mes atakenan formal den forma hopi sushi, manera ta custumber di cierto partido politico ta keda dirigi na Hulanda tur Santo dia. Duna Hulanda mal nomber internacionalmente, core hiba condecoracion, pero lubidando e paspoort Hulandes na cas. Ex Prome MInister tur dia ta ataca Hulanda y ta manda MInister Knops pa bay OM. Ta cuanto caso tin sin ser investiga cu tur Gobierno a hiba OM. Precisamente esaki ta loke Hulanda kier yuda nos pa drecha e.o. nos sistema hudicial y pone nan hendenan pa investiga tur e fraude, corupcion cu a tuma luga despues di nos Status Aparte, lagando nos pais den un pobreza total y cu hendenan hopi pober.
“Nos mester lanta gradici Dios cu nos ta pertenece na Hulanda, un di e paisnan mas rico den mundo, sino ta kico ta di nos awe? Hulanda a declara enfaticamente cu nan no ta interesa den nos autonomia, pero nan kier tin control con ta uza e placa cu nan ta manda nos y no cu ta mal uz’e. Hulanda sa bon cla kico ta tumando luga aki na Aruba. Ta politiconan mes a manda carta ariba carta pa keha otro di ta complace famia, amigo, corupcion, salarionan halto, pension y overbrugginstoelage miyonario. Danki na Hulanda cu te cu e luna aki, empleadonan publico, loonsubiside y fase por ser paga. Pa no lubida tur e pobernan cu ta ser yuda door di Hulanda, tambe ariba e tereno di Salubridad Publico.”
Y pa finalisa e ta bisa cu no mester papia y lubida cu nan salario y pensioen miyonario tambe ta Hulanda ta paga esakinan.
