E Arubiano, Aymar Middendorp, a duna un bon impresion cerca tanto e publico como e huradonan durante “blind auditions” den The Voice of Holland. Tanto asina cu el a haya e sosten di tur cuater miembro di hurado, kendenan a keda impresiona pa e energia y talento cu e Arubiano aki a desplega durante e show popular aki.
Aymar Middendorp ta yiu di mama Colombiano y tata Arubiano y e tin 32 aña di edad. E ta canta for di edad basta hoben. El a sigui les di canto via internet. E ta canta den diferente idioma, entre otro Italiano, Portugues, Spaño, Ingles, Frances, Papiamento y tambe Sur Africano.
Aymar tabata presente durante e audicionnan, hunto cu su pareha y mas famia. Nan tabata emociona, durante e entrevista cu a haci Aymar prome cu el a presenta. Nan tabata masha contento mes cu e hoben aki a yega asina leu.
Durante e entrevista a yama e mayornan di Aymar, kendenan a keda masha contento cu a yama nan. Nan a desea Aymar hopi exito cu su presentacion.
Tabata un fiesta completo na momento cu Aymar a cuminsa canta y di biaha despues di algun seconde, dos hurado, Lil Kleine y Ali B. a bira nan stoel. Despues di un rato otro dos hurado, esta Waylon y Anouk a bira.
Sigur un logro hopi grandi di Aymar kende a representa Aruba dignamente durante un competencia asina. Ainda nos por corda Vince Irie, kende tambe a yega leu den The Voice y Roger Peterson den Idols.
Un palabra di pabien ta bay pa Aymar. Nos di www.24.com ta dese’e hopi exito den The Voice.
