Ariba diasabra 9 di november Barracudas Aruba a bautisa e prome kalender cu e club a produci dunando un bista fotografico di e e deporte di landamento artistico y e atletanan formando parti di nos club.
Nos club ta depende completamente ariba e contibucion di miembronan y mayornan voluntario pa por existi, pa cual motibo ta organisa diferente actividadnan pa recauda fondo durante e temporada. E meta principal di e club ta pa brinda atletanan femenino y masculino oportunidadnan pa desaroya y prepara nan mes den e deporte pa competencianan international. Mirando cu Aruba semper tabata tin solamente un club di landamento sincronisa, tur esfuerso a enfoca riba competencianan internacional, loke sigur tabata clave pa e exito di e deporte aki. Biahenan a hiba nos atletanan hopi caminda, competiendo na paisnan manera Corsou, Venezuela, Colombia, Mexico, Merca, Canada, Suisa, Argentina, Brasil, Chile, El Salvador, Republica Dominicana, Barbados, Jamaica, Spaña, Italia, Hulanda, Puerto Rico, y hasta Sur Korea, Australia y China. Pa decadanan largo e atletanan di e equipo di landamento artistico a comparti nan amor pa e deporte cu otronan.
Pa e aña 2020 e club kier comparti e bunita deporte aki cu e pueblo di Aruba durante ful e pa aña cu potretnan di calidad pa admira henter e 12 luna nan. Cu e kalender aki nos ta duna honor na e 50 aniversario di De Barracuda’s Zwem en Polo Club cu a wordo funda na aña 1970 como un club di landamento. Den añanan despues a agrega e deporte di water ballet, introduci pa un pareha hulandes cu a bin biba na Aruba pa algun tempo. Mesora un grupo di personanan masha entusiasma a encanta cu e deporte aki. Na momento cu e deporte di landamento sincroniza a hasi su debut den e Weganan Olimpico na Los Angeles na 1984, Comite Olimpico Antiyano a selecta dos landador di Aruba, Esther Croes y Nicole Hoevertsz, pa representa Antiyanan Hulandes den e deporte di synchro. Cuater aña despues na Seoul (Sur Korea – 1988) Roswitha Lopez y Yvette Thuis a competi, integrando e prome delegacion di e pais nobo Aruba cu a participa na e Weganan Olimpico e aña ey.
E prome personan pa ricibi e kalender 2020 tawata: Esther Croes, Nicole Hoevertsz, Yvette Thuis y Roswitha Lopez (representa pa su ruman Natascha de Veer) un regalo na nos prome cuater (4) olimpiadenan den e deporte.
Nos kier a gradici tur persona y instancia cu den un of otro manera a contribui na hasi e lansamento di e kalender posibel, particularmente 297 Sports, Sr. Howard Hoo y Sra. Virginia Melendez pa e potretnan y e diseño grafico, y alabes Sra. Memita Gomez, Sra. Jo-Anne Croes y Sra. Esther Croes cu a traha incansabel pa brinda na nos comunidad e bunita kalender aki. “E kalender a keda hopi bunita y nos ta contento di por a lanse den un periode asina cortico. Lo no tawata posibel sin ayudo di varios persona cu a bini hunto pa traha cu amor pa e club.” Sra. Memita Gomez ta remarca.
E kalender ta obtenibel serca tur miembro di e club, lo por yama of whatsapp na 592-5966 bishita nos facebook page @barracudas.aruba, of email [email protected] pa hasi pedido.
Nos club ta consisti di mas cu 50 atleta den diferente categoria:
Categoria Beginners. Tur atleta cu ta den nan prome aña di landamento artistico
Categoria di 11-12. Tur atleta di 12 aña y mas jong.
Categoria di 13 -15. Tur atleta entre e edad di 13 pa 15 aña.
Categoria Junior. Junior ta categoria di 15 pa 18 aña.
Categoria Senior. Tur atelta di 18 aña bai ariba.
Recientemente a introduci e programa di diasabra Mermaids & Sharks pa e comunidad di Aruba, cu ta inclui:
Pre-beginners: muchanan cu ainda no tin diploma A, pero cu ta desea di bira un tiki mas comodo den awa prome cu pasa pa e beginners/stars program di landamento artistico. Diasabra 3-4pm.
Athletes with Unique Abilities (AUA): e programa aki lo ta pa muchanan cu cualkier limitacion, reconociendo e grupo di muchanan special di Aruba cu tambe kier landa, kisas te hasta identifica talentonan cu un dia lo por participa na Paralympics den e deporte di landamento artistico. Diasabra 4-5pm.
Adult Swimming: Un grupo di adulto y teenagers cu ta desea di siña landa, kier traha riba condicion of tonifica e curpa. Diasabra 4-5pm.
Pa mas informacion of pa conecta cu nos por bishita nos website: www.barracudasaruba.com
