Recientemente e Minister di Transporte, Comunicacion y Sector Primario, Chris Romero a bishita Departamento Meterorologico di Aruba (Meteo). A haci uzo di e oportunidad pa felicita 2 funcionario nobo cu a gradua recientemente pa e curso di observado di tempo, esta un WMO Meteorological Technician y un otro funcionario mas cu a obtene su certificado como pronosticado di tempo. Joël Kirchner y Nigel Fuentes ta e funcionarionan cu a completa nan estudio como observado y ta trahando na Meteo como tal for di aña pasa caba. Tambe a felicita Rodney Tromp cu recientemente a gradua como pronosticado di tempo, na Hulandes conoci como weerman.
Rodney Tromp tin un carera admirabel na Departamento Meteorologico di Aruba, unda cu el cuminsa como leerling- observator na aña 2003 y awor a culmina su estudionan. Minister Chris Romero a felicita y elogia e 3 funcionarionan cu nan logro, como tambe a gradici e departamento completo pa nan trabou profesional y corecto cu nan semper a sa di hiba.
Mester menciona cu na Aruba actualmente nos tin solamente un meteorologo diploma, den persona di dr. Marck Oduber. Asina mes, e minister a opta pa mand’e cas p’e cobra sin por traha. Di otro banda a manda busca un persona for di Corsou, cu tampoco ta un meteorologo, cu awor ta dunando curso do observado di tempo y pronosticado di tempo. Pa por bira un meteorologo, mester atende Universidad pasobra e ta un estudio universitario di por lo menos 4 aña.
