Recientemente e federacion di esgrima Arubano, SABA a organisa nan competencia internacional di esgrima bou nomber di Dutch Caribbean Fencing Championship 2017.
Dos aña pasa, e federacion di esgrima SABA a organisa e campeonato aki pa ultimo biaha na Aruba. A bin atletanan di esgrima for di Corsow kendenan a bini competi contra esnan di Aruba. E competencia cu a tuma lugar den Centro Deportivo Betico Croes na Sta Cruz a dura dos dia y tabata den e discplinanan di degen y floret. Pa loke ta e resultadonan mas yamativo obteni pa nos atletanan di esgrima tin cu bisa cu den e categoria 11 aña di edad den e disciplinanan di Sabre, Foil y Epee e hoben Nikaina Thompson ta conkista den tur tres disciplina e prome lugar. Den e categoria junior y senior mix Sabre, aki Tirslain Jansen ta logra un prome lugar mientras den Foil, Tirslain ta logra un di 3 lugar. Den e categoria Cadet den mix Sabre, mix Foil y mix Epee, e hoben Alex Wever a sa na gana den e dos di e tres discplinanan competi. Alex ta triunfa den Foil y Epee mientras den Sabre e ta keda na di dos lugar. Mester bisa cu Aruba a gana den e categoria Ekipo lidera pa nan capitan Tirslain
Jansen, Ezzedean Vrolijk, Shellian Thompson, Alex Wever y Sofia Dorcas. Na banda di e Dutch Caribbean Fencing Championship 2017, e federacion di esgrima a organisa un workshop di esgrima duna pa e experto mr. Sarkis Assadorian.
Mester bisa cu e workshop
aki tabata un exito rotundo unda e experto mr. Assadorian durante 6 dia largo a duna diferente tayer unda a enfoca riba e agilidad, reflex, resistencia, habilidadnan basico, drills y mas cu claro con pa anda cu e materiaal di esgrima. Tambe a duna lesnan priva y con pa coach ora di competencia. No tin duda cu esnan cu e sigui e e workshop aki a amplia un tiki mas nan conocimento den e ramo di deporte di arte martial aki. Un danki sigur na Lotto, e Loteria di Aruba pa medio di Comision di Subsidio cu a subsidia e competencia di Dutch Caribbean Fencing Championship 2017 den esgrima y e workshop di esgrima duna pa e experto internacional, mr. Sarkis Assadorian. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
