Tabata pa 7:20 pm cu a sosode un accidente serio na e crusada di Adriaan Lacle Boulevard y L.G. Smith Boulevard, entre un van y un brommer. E motociclista a resulta gravemente herida y tabata benta riba caminda.
Ta trata aki di un auto estilo van color blanco numera A-9947 y un brommer. E prome patruya di polis pa yega na e sitio a constata cu e situacion di e victima tabata serio y a solicita presencia di ambulance cu maximo urgencia na e sitio.
No obstante tur esfuerso di e personal di cuido riba ambulance, toch no a keda nada otro cu solicita presencia di un dokter na e sitio di desgracia. Pa 8:05 pm dokter Texier a constata morto di Kiven Michael Dania, naci na Aruba dia 5 di januari 2000, pues tin 21 aña di edad.
Testigonan a conta nos cu a mira e motociclista ta hop basta rato den vecindario. Asina mes, e prome indicacion ta mustra cu e van a lora su dilanti, sin cu a mira e brommer biniendo abou. Tabatin bastante amigo y famia den vecindario pasobra un rato despues di accidente tur a yega y tabata masha tristo pa locual nan a topa cu ne.
E victima ta bira e prome morto den trafico pa e aña aki. E ta bay laga atras su pareha Juhaila Dubero y un baby mucha homber di apenas 1 aña di edad.
Nos ta expresa palabranan di condolencia na famia y amigonan di e fayecido. Cu e sosega na paz.
