Crisis Team a informa cu e medidanan tuma desde siman pasa tin cu sigui na vigor un siman mas, te cu dia 23 di April. E circunstancianan di capacidad di cuido na Hospital y otro factornan di riesgo, no ta permiti cu na e momentonan aki por flexibilisa medidanan.
Crisis Team tin comprencion pa e sectornan afecta den nos comunidad. Pesey a sinta na mesa cu sector comercial pa asina pone nan na altura di e situacion y dicon ta importante pa sigui mantene e medidanan na vigor. Otro siman lo sinta cu esnan di Gym pa informa nan tambe di e situacion y alabes pa pone tambe atencion riba e protocol cu Gymnan tin cu atene nan mes na dje mescos cu tur otro instancia cu ta ricibi publico.
Na e momentonan aki e variante Britanico ta 85% di e casonan y ta plama mas rapido, cu ta causa mas infeccion, hospitalisacion y morto. Nos mester haci tur locual ta necesario pa proteha nos poblacion y controla mas cu por e plamamento di E virus.
Te ainda falta 25% di esunnan 60 plus pa vacuna y tambe un grupo grandi di esunnan vulnerabel den nos comunidad. Pesey ta urgi un y tur cu ainda no a vacuna pa registra pa nan haya nan vacuna. Mas hende vacuna, menos hende ta bira malo di e virus, menos chens e virus tin di bira mas infeccioso y peligroso den nos comunidad y mas lihe por flexibilisa medidanan.
