Esaki ta loke director di Departamento di Finanza sr. Derrick Werleman, a bisa den e Cumbre di Gobierno cu sindicato y gremio.
E mainta a habri cu Prome Minister Evelyn Wever Croes dunando un splicacion di e situacion reinante di e condicionnan cu Hulanda a pone pa ayudo financiero. A duna un splicacion di kico a haci den e periodo di e prome dos prestamonan, e falta di confiansa cu Hulanda a demostra te cu awo y con e condicionnan poni ta un muestra di confiansa. “Esaki ta loke tin nos rabia,” Prome Minister Wever Croes a splica.
A splica pakico te na e momentonan aki ainda no por a revela tur loke ta para den e dossier di 218 pagina. Esaki ta pasobra a hinke como un documento di Rijksministerraad cu tur loke ta para of bay eyden ta secreto. A pidi permiso caba na Minister Knops pa kita e secrecia cu tin pa Gobierno di Aruba por hiba dialogo cu stakeholdernan. E contesta tabata negativo, pa cual el a manda un carta un poco rabia pa Prome Minister Mark Rutte, na kende el a expresa su disgusto y di Aruba y tambe permiso pa por haci uzo di e contenido pa duna splicacion na pueblo di Aruba di e condicionnan cu Hulanda ta pone.
Director di Departamento Huridico di Gobierno George Croes y director di Departamento di Finanza Derrick Werleman, a bay amplio riba e situacion di Aruba, y tur e consecuencianan cu e prestamonan ta trece pa Aruba, pero tambe con dificil e ta pa haya e placa aki otro caminda sin ningun interes. Un prestamo cu no mester paga mesora sino te aki dos aña.
Werleman a splica cu nan tabata den contacto continuo cu Ministerio di Raymond Knops, particularmente pa loke ta e parti cu a pidi cu exoneracion di pago di e debenan aki cu tin cu Hulanda (manera Corsou a yega di haya den pasado) of reduccion di debe. Definitivamente no ta bay tin e posibilidad aki pa Aruba, ta loke Werleman a tende awe mainta for di Hulanda.
E cumbre a cuminsa rond di 10’or di mainta y pa awe merdia 2’or lo tin dialogo cu politiconan.
